काठमाडौँ । नेपाल धितोपत्र बोर्डले आइएमई लाइफ इन्स्योरेन्स कम्पनीलाई प्रिमियममा आईपीओ जारी गर्न अनुमति दिएको छ। योसँगै आईएमई लाइफ नेपालको बीमा क्षेत्रमा पहिलोपटक प्रिमियममा आईपीओ निष्कासन गर्ने कम्पनी भएको छ।
बोर्डले कम्पनीलाई चुक्तापुँजीको ३० प्रतिशत बराबरको आइपीओ निष्काशन गर्न हिजो जेठ २३ गते अनुमति दिएको हो ।
बोर्डको अनुमतिसँगै अब कम्पनीले चुक्तापुँजीको ३० प्रतिशतले हुन आउने १ करोड २० लाख कित्ता आईपीओ बिक्री खुला गर्नेछ। कम्पनीले १०० अंकित दरमा १३६.९१ रुपैयाँ प्रिमियम थपेर प्रतिकित्ता २३६.९१ रुपैयाँ आईपीओ बिक्री खुला गर्नेछ।
कुल कित्तामध्ये ६ लाख कित्ता सेयर कर्मचारीहरुका लागि अंकित मूल्य १०० रुपैयाँमै छुट्याएको छ। बाँकी १ करोड १४ लाख कित्तामा सर्वसाधारण (कर्मचारी र सामूहिक लगानी कोषसहित)ले आवेदन दिन पाउनेछन्।
कम्पनीले उक्त आइपीओ निष्काशन तथा बिक्री प्रबन्धकमा सिभिल क्यापिटल मार्केट लिमिटेडलाई नियुक्त गरेको छ । कम्पनीले उक्त आइपीओ बिक्री गरेर २ अर्ब ७६ करोड ७ लाख ६४ हजार रुपैयाँ जुटाउनेछ।
आईपीओ निष्कासनका लागि गरिएको रेटिङमा केयर रेटिङ नेपालले कम्पनीलाई ‘केयर ट्रिपल बी इस्युअर’ रेटिङ प्रदान गरेको हो। चालु आर्थिक वर्षको तेस्रो त्रैमाससम्म कम्पनीले रु. २ अर्ब ९८ करोड ५८ लाख कुल बीमा शुल्क आर्जन गरेको छ। यस अवधिमा कम्पनीले कम्पनीले रु. २ अर्ब ८९ करोड ४ लाख खुद बीमा शुल्क आर्जन गरेको छ।
कम्पनीको चुक्तापुँजी रु. २ अर्ब ८० करोड रुपैयाँ रहेको छ। यस अवधिसम्ममा कम्पनीको जगेडा कोषमा रु. १ अर्ब १० करोड ५ लाख रुपैयाँ संचिती रहेको छ।
यसैगरी जीवन बीमा कोषमा रु. ६ अर्ब ७ करोड ७३ लाख रुपैयाँ रहेको छ र कम्पनीको दीर्घकालीन लगानी तथा कर्जा रु. ८ अर्ब ४ करोड ७१ लाख रुपैयाँ रहेको छ।
तेस्रो त्रैमाससम्ममा खुद नाफा रु. १८ करोड २४ लाख रुपैयाँ आर्जन गरेको कम्पनीको वार्षिक प्रतिसेयर आम्दानी रु. ८.६९ रुपैयाँ रहेको छ भने प्रतिसेयर नेटवर्थ १४३.६७ रुपैयाँ रहेको छ।
नेपालको प्रतिष्ठित र अग्रणी व्यावसायिक समूह आइएमई ग्रुपद्वारा प्रवर्द्धित विभिन्न कम्पनीहरुमध्ये आइएमई लाइफ इन्स्योरेन्स कम्पनी पनि एक हो।
दक्ष तथा अनुभवी व्यवस्थापनद्वारा सञ्चालित आइएमई लाइफ इन्स्योरेन्सले बीमित तथा सेयरधनीहरूलाई उच्चतम प्रतिफल प्रदान गर्ने लक्ष्य लिएको छ। आर्थिक विकासमा बीमा क्षेत्रबाट अर्थपूर्ण सहभागिता जनाउनु कम्पनीको उद्देश्य रहेको छ।
प्रतिक्रिया दिनुहोस्