काठमाडौं । सीडीएस एण्ड क्लियरिङ लिमिटेड (सिडीएससी) ले ७ वटा नयाँ ब्रोकर कम्पनीलाई ‘क्लियरिङ मेम्बर’ अर्थात् राफसाफ सदस्यता प्रदान गरेको छ ।
नयाँ ब्रोकरहरुले असार २२ गते राफसाफ सदस्यताको लागि आवेदन दिएकोमा असार २५ गते सोमबार राफसाफ सदस्यता प्रदान गरिएको सिडीएसका प्रमुख कार्यकारी अधिकृत पूर्ण प्रसाद आचार्यले जानकारी दिए ।
सिडीएससीले सन सेक्युरिटिज, हिमालयन ब्रोकरेज, मियो सेक्युरिटिज, सेयरप्रो सेक्युरिटिज, भोले गणेश सेक्युरिटिज, क्यापिटल म्याक्स सेक्युरिटिज र प्रोपर्टी विजार्ड प्रा.लीलाई राफसाफ सदस्यता प्रदान गरेको छ ।
नेपाल स्टक एक्सचेञ्ज (नेप्से)ले गत बिहीबार (असार २१ गते) ७ वटा नयाँ ब्रोकर कम्पनीलाई कारोबार सदस्यता प्रदान गरेको थियो । नेप्से सञ्चालक समितिको बुधबार बसेको बैठकले मापदण्ड पूरा गरेका नयाँ ब्रोकर कम्पनीलाई कारोबार सदस्यता प्रदान गर्ने निर्णय गरेको थियो। सोही निर्णयबमोजिम भौतिक र प्राविधिक रुपमा सबै मापदण्ड पूरा गरेका ७ वटा ब्रोकर कम्पनीलाई कारोबार सदस्यता प्रदान गरिएको थियो ।
सेबोनमा आवेदन दिएका ४३ वटा कम्पनीमध्ये १८ वटा कम्पनीले नयाँ ब्रोकर लाइसेन्स पाएका थिए। सेबोनबाट दोस्रो चरणमा लाइसेन्स पाएका ११ वटाले पनि कारोबार सदस्यताका लागि नेप्सेमा निवेदन दिइसकेका छन्।
प्रतिक्रिया दिनुहोस्