काठमाडौं । नेपाल राष्ट्र बैंकले विकास ऋणपत्र जारी गर्दै १० अर्ब रुपैयाँ आन्तरिक ऋण उठाउने भएको छ । राष्ट्र बैंकलेले यही असोज १९ गते बिहीबार विकास ऋणपत्र २०८८ ‘ङ’ जारी गर्ने जनाएको छ ।
केन्द्रीय बैंकले असोज १९ गते ८ वर्षे अवधिको १० अर्ब रुपैयाँको विकास ऋणपत्र जारी गर्नेछ। यो ऋणपत्र भोलि (असोज १८ गते) बोलकबोलमार्फत बिक्री गरिनेछ।
यो ऋणपत्रमा इच्छुक बैंक तथा वित्तीय संस्था, गैरबैंक वित्तीय संस्था, बीमा कम्पनी, संगठित संस्था तथा नेपाली नागरिकले बोलपत्र पेस गर्न सक्नेछन्।
बोलकबोलमा इच्छुक खरिदकर्ता प्रतिस्पर्धी वा अप्रतिस्पर्धीका रुपमा सहभागी हुन पाउनेछन्। प्रतिस्पर्धी र अप्रतिस्पर्धी बोलकबोलहरुलाई क्रमशः निष्काशित रकमको ८५ र १५ प्रतिशत अर्थात् रु. ८ अर्ब ५० करोड र रु. १ अर्ब ५० करोड छुट्याइएको छ। अप्रतिस्पर्धी बोलवालाहरुलाई छुट्याइएको रकमका लागि पूरा बोल प्राप्त नभएमा बाँकी हुन आउने रकम प्रतिस्पर्धी बोलवालाहरुलाई बिक्री गरिनेछ।
अप्रतिस्पर्धी बोलवालाहरुलाई छुट्याइएको रकमभन्दा बढी रकमको बोल प्राप्त हुन आएमा बोलवालाहरुलाई समानुपातिक रुपमा ऋणपत्रको रकम बाँडफाँड गरिने बैंकले जनाएको छ।
यो ऋणपत्रको ब्याजदर पनि बोलकबोलमार्फत तय हुनेछ। अर्थवार्षिकरुपमा ब्याजदर भुक्तानी गर्ने बैंकले जनाएको छ । यो ऋणपत्र २०८८ असोज १९ गते परिपक्क हुने राष्ट्र बैंकले जनाएको छ । यो ऋणपत्र धितो राखी कर्जा लिन तथा दिन पाइनेछ।
नेपाल राष्ट्र बैंकले आन्तरिक ऋण उठाउन तथा विकास आयोजना निमार्ण गर्नका लागि विकास ऋणपत्र निष्काशन गर्ने गर्दछ। विकास ऋणपत्र दीर्घकालीन अवधिको आन्तरिक ऋण उठाउन दुई वा सो भन्दा बढी वर्षका लागि प्रयोग गरिने सरकारी औजार हो।
हाल राष्ट्र बैंकबाट निष्कासन भएका विकास ऋणपत्र ५, ७, ८, ९, १०, ११, १२, १३ र १५ वर्षे अवधिका रहेका छन् । नेपाल सरकारको आवश्यकतानुसार यो ऋणपत्रको अवधि निर्धारण गरिन्छ ।
प्रतिक्रिया दिनुहोस्