काठमाडौं । प्रधानमन्त्री पुष्पकमल दाहाल प्रचण्ड बर्दिबास पुगेका छन् । नेकपा माओवादी केन्द्रको आन्तरिक बैठक तथा प्रशिक्षण कार्यक्रममा सहभागी हुन प्रधानमन्त्री मंगलबार विहान महोत्तरीको बर्दिबास पुगेका छन्।
आजदेखि बर्दिबास–४ माइस्थानमा हुन लागेको माओवादी केन्द्रको तीन महिने विशेष रुपान्तरण अभियान अन्गर्ततको मधेस प्रदेश समीक्षा बैठकमा सहभागी हुन प्रचण्ड महोत्तरी पुगेको माओवादी केन्द्रका मधेस प्रदेश इञ्चार्ज लीलामणि पोखरेलले बताए ।
पोखरेलका अनुसार कार्यक्रममा मधेस प्रदेशबाट पार्टी केन्द्रीय समितिमा प्रतिनिधित्व गर्ने सदस्य, जिल्ला इञ्चार्ज र रुपान्तरण अभियानका जिल्ला संयोजकबीच अभियानारे समीक्षा हुनेछ।
प्रदेशका आठवटै जिल्लामा सञ्चालित अभियानको जिल्ला इञ्चार्जबाट जानकारी लिएपछि अध्यक्ष दाहालले थप निर्देशन दिने पोखरेलले बताए।
अध्यक्ष प्रचण्ड आजै दिउँसो महोत्तरीको गौशाला–५ स्थित बहुद्देश्यीय भवनमा सञ्चालन हुने पार्टीको प्रदेशस्तरीय प्रशिक्षण कार्यक्रममा सहभागी हुनेछन्।
प्रशिक्षणमा प्रदेशबाट प्रतिनिधित्व गर्ने केन्द्रीय सदस्य, प्रदेश समिति पदाधिकारी तथा सदस्य, अभियानका जिल्ला संयोजक र सम्बद्ध सदस्यहरु, जिल्ला अध्यक्षसहित एक हजार आठ सय नेता सहभागी हुने कार्यक्रम छ।
प्रतिक्रिया दिनुहोस्