काठमाडाैँ । उद्योग, वाणिज्य तथा आपूर्तिमन्त्री दामोदर भण्डारीले नेपाल पारवहन तथा गोदाम व्यवस्था कम्पनी अहिलेकै अवस्थामा चल्न नसक्ने बताए ।
आइतबार नेपाल पारवहन तथा गोदाम व्यवस्था कम्पनी लिमिटेडको ५४ औं वार्षिकोत्सव समारोहको उद्घाटन कार्यक्रममा उद्योग मन्त्री भण्डारीले संस्थाबाट विभिन्न सुख्खा बन्दरगाहहरुमा डलरमा तलब खुवाएर कर्मचारी राखिए पनि सन्तोषजनक देखिने गरी काम नभएको भन्दै असन्तुष्टि व्यक्त गरे ।
उनले तेस्रो मुलुकमा निर्यातभन्दा आयात धेरै भइरहेको अवस्थामा समेत पारवहन कम्पनीले निर्यात बढाउने काम गर्न नसकेको बताए ।
पारवहनको संरचना समय सापेक्ष हिसाबले बढ्नुपर्नेमा घट्दै गएको पनि उनले उल्लेख गरे । उनले पारवहन तथा गोदाम व्यवस्थापन कम्पनी यही ढङ्ले चल्न नसक्ने र सरकारले पनि सधैँ धान्न नसक्ने स्पष्ट पारे ।
फजुल सरकारी बजेट दुरुपयोग भइरहेकाले मुलुकबाट विदेशमा निर्यात बढाउनको लागि ठोस नीति आवश्यक रहेको उनले उल्लेख गरे ।
नेपाली वस्तुको निर्यात बढाउन ठोस नीतिको आवश्यकता रहेको भन्दै सरकारले नीति बनाउन सहयोग गर्ने उनकाे भनाइ छ । उनले नेपाली वस्तुको तेस्रो मुलुकमा निर्यात न्युन रहेकाले निर्यात बढाउन ठोस नीति बनाउनुपर्नेमा जोड दिए ।
उनले भारतका विभिन्न ठाउँमा रहेका पोर्टहरुको अवस्था नाजुक रहेको उल्लेख गरे । भारतका सुख्खा बन्दरवाहमा व्यवस्थित बनाउन उनले निर्देशन दिए । उनले पारवहनका पदाधिकारीलाई साझेदार संस्थाहरुसँग हातेमालो गरेर ठोस योजना बनाउन निर्देशन दिएका छन् ।
प्रतिक्रिया दिनुहोस्