बझाङमा जीप दुर्घटना, ४ जनाको मृत्यु

काठमाडौँ । बझाङमा जीप दुर्घटना हुँदा चालकसहित ४ जनाको मृत्यु भएको छ ।

बिहीबार राति तलकोट गाउँपालिकाबाट सदरमुकाम चैनपुर जाने क्रममा धमेना नजिकै से १ ज ८४३ नम्बरको बोलेरो जीप दुर्घटना हुँदा चार जनाको मृत्यु भएको जिल्ला प्रहरी प्रमुख युवराज भण्डारीले जानकारी दिए ।

भण्डारीका अनुसार एकै परिवारका तीन जनाको घटनास्थलमा र एक जनाको उपचारका लागि अस्पताल लैजाँदै गर्दा मृत्यु भएको हो ।

दुर्घटनामा केदारस्युँ गाउँपालिका –१ रायलका ३३ वर्षीय शम्शेर मल्ल, तलकोट गाउँपालिका –४ का ३६ वर्षीय बम बहादुर धामी, पाँच वर्षीया आकृती धामी, ७२ वर्षीया जोगेनी देवी धामीको मृत्यु भएको हो ।

बिहिबार राति साढे आठ बजे तलकोट गाउँपालिकाबाट चैनपुर तिर आइरहेको उक्त जिप सडकबाट करिब दुई सय मिटर तल खसेको थियो ।