काठमाडाैँ । भृकुटीमण्डपमा जारी नेपाल एग्रीटेक तथा नेपाल फुड एण्ड बेभरेज इन्टरनेशनल एक्स्पोमा कृषि उद्यमी तथा व्यवसायी खुशी देखिएका छन् ।
शुक्रवारदेखि जारी एक्स्पोमा विभिन्न स्टलमार्फत आफ्ना उत्पादनले बजार पाएपछि कृषि उद्यमीहरु खुशी भएका हुन् । सोलुखुम्बुका कृषक तिलकबहादुर राईले स्टलमार्फत आफ्ना कृषि उत्पादन विक्री गर्न प्रधानमन्त्री कृषि आधुनिक परियोजनाले सहजीकरण गरेको बताए । किसान आफैँ उपभोक्तासँग साक्षातकार गरी वस्तु विक्री गर्दा नाफा सोझै किसानलाई पुगेको उनको भनाइ छ ।
तामाकोशी एण्ड रिसर्च प्रा.लि.का प्रोपाइटर हिरालाल श्रेष्ठले मेलामा रामेछापको जुनारले राम्रो बजार पाएको बताए । उनले जुनार टिप्दा सावधानी अपनाउन नसक्दा चोट लाग्ने र नेपालको जुनार कमजोर छ भन्ने गलत सन्देश बजारमा गइरहेको बताए । उनले उत्पादित वस्तुको गुणस्तर कायम राख्नका लागि राज्यले प्रविधि दिनुपर्ने बताए ।
प्रधानमन्त्री कृषि आधुनिक परियोजनाका सिनियर एग्रिकल्चर इन्जिनियर डा. जित चन्द परियोजनाकै कारण नेपालमा केषि यान्त्रिकीकरणको बहस गाउँसम्म पुगेको बताउँछन् । परियोजनाको नौ वटा रणनीतिअनुसार काम भइरहेको भन्दै उहाँले कृषि यान्त्रिकीकरण मुख्य रणनीति भएको बताए ।
च्याउ उत्पादन किसान संघ सहअध्यक्ष तथा गोकर्णेश्वर च्याउ समूहका अध्यक्ष सीतारम तिम्सिना नेपालमा ३५ हजार व्यक्ति प्रत्यक्ष रुपमा च्याउ उत्पादनको रोजगारमा रहेको बताउँछन् । उनले घरमै पनि च्याउ उत्पादन गरेर खान सकिने बताए । यस्तो मेलाले कृषि उत्पादनहरूलाई बजारीकरण गर्न राम्रो फाइदा पुग्ने विश्वास व्यक्त गरे । राज्यको राम्रै आम्दानीको स्रोत बनेको च्याउ उत्पादनका बारेमा सीप तथा प्रविधि पनि हस्तान्तर गर्न मेलामा सहभागी बनेको उनकाे भनाइ छ ।
तिम्सिनाले आजभोलि विावह लगायत जुनसुकै भोजमा पनि च्याउको परिकार अनिवार्य गर्न थालिएको बताए। शरीरका लागि चाहिने आवश्यक विभिन्न तत्वहरु च्याउबाट पाइने भएकाले साकाहारीका लागि सबैभन्दा राम्रो च्याउ नै भएको उनको भनाइ छ ।
मिडिया स्पेस सोलुसन प्रा.लि.का प्रवन्ध निर्देशक सिर्जल भट्टराईले मेलाले नेपालमा उत्पादित कृषि उपजलाई विदेश पठाउन योग्य कसरी बनाउन सकिन्छ भनेर अभ्यास गर्न खोजेको बताए । उनले यस्तो मेला आयोजना गर्दा कृषि उद्यमीलाई फाइदा पुग्नुका साथै उत्पादनलाई अन्तर्राष्ट्रिय बजारमा चिनाउन बाटो खुल्ने बताए ।
भुकृटीमण्डपमा जारी सातौं नेपाल एग्रीटेक तथा नेपाल फुड एण्ड बेभरेज इन्टरनेशनल एक्स्पोले उत्पादित वस्तुको बजारिकरण गर्नुका साथै सीप तथा प्रविधिसमेत हस्तान्तरण गर्ने भएकाले किसान तथा कृषि उद्यमीका लागि राम्रो अवसर हुने देखिएको छ । मेला आज साँझसम्म मात्रै सञ्चालन हुनेछ । —न्युज एजेन्सी नेपाल
प्रतिक्रिया दिनुहोस्