काठमाडौँ । प्रधानमन्त्री केपी शर्मा ओलीले सहकारी क्षेत्रमा देखिएका अनियमितताहरू समाधान गर्न सरकार गम्भीर रूपमा लागिपरेको बताएका छन्। प्रतिनिधिसभाको बैठकमा सांसदहरूको प्रश्नको जवाफ दिने क्रममा उनले चालु आर्थिक वर्षमा मात्रै नेपाल प्रहरीले सहकारी ठगीसम्बन्धी रु. ५ अर्ब ११ करोड ठगीको आरोपमा ४८ वटा मुद्दा दर्ता गरिसकेको जानकारी दिए।
प्रधानमन्त्री ओलीका अनुसार सहकारी क्षेत्रमा भएका समस्या समाधान गर्न सरकारले नीतिगत, संस्थागत, र व्यवस्थापकीय सुधारका उपायहरू अपनाइरहेको छ। यसैक्रममा, सहकारीसम्बन्धी केही नेपाल ऐनलाई संशोधन गर्न बनेको अध्यादेश, २०८१ जारी गरिएको छ, जसले यस क्षेत्रमा सुधार ल्याउने विश्वास गरिएको छ।
उनले बचत तथा ऋण सहकारीहरूको नियमन प्रभावकारी बनाउन राष्ट्रिय सहकारी नियमन प्राधिकरण गठन भइसकेको र यसको कार्यान्वयन अघि बढिरहेको बताए। साथै, सरकारले सहकारी क्षेत्रमा भएका अनियमितता न्यून गर्न आवश्यक कदम चाल्ने प्रतिबद्धता जनाउँदै पीडित बचतकर्ताहरूको हकहित सुरक्षित गरिने उल्लेख गरे।
प्रतिक्रिया दिनुहोस्