प्रदेश संरचनामा नागरिकको आवश्यकताअनुसार सुधार गर्न सकिन्छ: प्रधानमन्त्री ओली

काठमाडाैँ । प्रधानमन्त्री केपी शर्मा ओलीले प्रदेश संरचनामा सुधारका लागि नागरिकको आवश्यकताअनुसार प्रदेश घटबढ गर्न सकिने बताएका छन् ।

शनिबार बालकोटको घरमा आयोजित राधिका शाक्यको आत्मकथा करुणा को लोकार्पण समारोहमा सम्बोधन गर्दै प्रधानमन्त्री ओलीले लोकतन्त्र र लोकतान्त्रिक प्रणालीमा हेरफेर सम्भावना रहेको बताएका हुन् ।

उनले भने, “लोकतन्त्र र लोकतान्त्रिक प्रणालीमा हेरफेर र सुधार हुनसक्दछन्, तर यसको संरचनागत पक्षमा सुधार बढी हुनसक्छ। सात प्रदेशलाई नौ वा पाँचमा पनि परिणत गर्न सकिन्छ, यसको आवश्यकता देशको विकास र जनताको आवश्यकतामा आधारित हुन्छ। यस्तो परिवर्तन गर्दा रुवाबासी गर्नुपर्ने कुनै कारण छैन ।”

प्रधानमन्त्री ओलीले उक्त कार्यक्रममा थपे, “देशको आवश्यकता र विकासका लागि सुधारको आवश्यकता पर्छ। हामीले राजनीतिक परिवर्तनको सट्टा सुधार र रिफर्मलाई प्राथमिकता दिनुपर्छ। यसलाई सामान्य रूपमा लिनुपर्छ ।”

बालकोटको घर र राधिका शाक्यको योगदान
प्रधानमन्त्री ओलीले आफ्नो बालकोटको घरलाई आफ्नो बलबुताले नबनाएको, बरु श्रीमती राधिका शाक्यको कमाइबाट बनाएको बताए ।

उनले भने, “त्यो घर नेपाल ट्रस्टलाई दान गरेको छ। मेरो कमाइ दान गरेको होइन, उनकै कमाइ दान गरेको हो। म जति श्रीमतीसँग खुशी छु, शायद अरू कोही पनि त्यति खुशी हुँदैन। राधिका नहुने हो भने म अहिलेसम्म बाँच्न असम्भव थियो ।”

प्रधानमन्त्री ओलीका यी भनाइहरूले लोकतान्त्रिक प्रणाली र सुधारका विषयमा छलफल गरिरहेका बेला, उनले आफ्नो व्यक्तिगत जीवनको बारेमा पनि एउटा मानवीय रचनात्मक दृष्टिकोण प्रस्तुत गरेका छन् ।