काठमाडौं । अमेरिकी राष्ट्रपति डोनाल्ड ट्रम्पले कुख्यात अपराधी राखिने अल्काट्राज जेल पुन: खोल्ने घोषणा गरेका छन् ।
राष्ट्रपति ट्रम्पले संघीय कारागार ब्यूरोलाई सान फ्रान्सिस्को खाडीमा रहेको कुख्यात अल्काट्राज जेल पुननिर्माण गरेर पुन: खोल्न निर्देशन दिएका हुन् । उक्त जेलमा अमेरिकाका सबैभन्दा निर्दयी र हिंसात्मक अपराधीहरूलाई राख्ने ट्रम्पले बताएका छन् ।
“अल्काट्राजलाई पुनर्निर्माण गर्नुहोस्, र खोल्नुहोस् । धेरै लामो समयदेखि, अमेरिका क्रूर, हिंसात्मक, र दोहोरिने आपराधिक अपराधीहरू, समाजका फोहोरहरूबाट पीडित छ, जसले दुःख र पीडा बाहेक अरू केहि योगदान गर्दैनन्।” ट्रम्पले सामाजिक सञ्जाल ट्रुथमा लेखेका छन्, “म न्याय विभाग, एफबीआई र होमल्याण्ड सेक्युरिटीसँग मिलेर कारागार ब्यूरोलाई अमेरिकाका सबैभन्दा निर्दयी र हिंसात्मक अपराधीहरूलाई राख्नको लागि पर्याप्त रूपमा विस्तारित र पुननिर्मित अल्काट्राज पुन: खोल्न निर्देशन दिइरहेको छु ।”
अल्काट्राजको संघीय जेल सन् १९६३ मा बन्द हुनुभन्दा पहिले अल क्यापोन जस्ता कुख्यात अमेरिकी अपराधीहरूलाई राखिएको थियो। यो अहिले सान फ्रान्सिस्कोको लोकप्रिय पर्यटकीय गन्तव्यहरू मध्ये एक हो।
सान फ्रान्सिस्को खाडीमा रहेको पूर्व सैन्य किल्ला र जेल, अल्काट्राज टापुलाई १९३४ मा संघीय जेलखानामा परिणत गरिएको थियो र २९ वर्षको अवधिमा १५ सयभन्दा बढी अपराधी राखिएको थियो ।
अमेरिकाकाे संघीय कारागार ब्यूरोको वेबसाइटका अनुसार टापुमा रहेकाे उक्त जेल सञ्चालन गर्न धेरै महँगो भएकोले बन्द गरिएको थियो। यो अन्य कुनै पनि संघीय कारागार भन्दा सञ्चालन गर्न लगभग तीन गुणा महँगो भएकाे वेबसाइटमा उल्लेख छ ।
प्रतिक्रिया दिनुहोस्