संघीय संसदका दुवै सदनको बैठक आज बस्दै

काठमाडौं । संघीय संसदको दुवै सदनको बैठक आज बस्ने भएको छ । प्रतिनिधिसभाको बैठक आज अपराह्न १ बजे बस्दै संघीय संसद सचिवालयले जनाएको छ ।

आजको बैठकमा उपप्रधानमन्त्री तथा अर्थमन्त्री विष्णुप्रसाद पौडेलले वक्तव्यसहित ‘आर्थिक बर्ष २०८२र८३ को राजश्व र व्ययको वार्षिक अनुमानमाथि सामान्य छलफल गरियोस्’ भन्ने प्रस्ताव पेस गर्ने र प्रस्तावमाथि छलफल हुने कार्यसूची छ ।

यस्तै, राज्य व्यवस्था तथा सुशासन समितिका सभापति रामहरि खतिवडाले ‘संघीय निजामति सेवा विधेयकसम्बन्धी समितिको प्रतिवेदन, २०८२’ पेस गर्नेछन् ।

राष्ट्रियसभाको बैठक अपराह्न सवा १ बजे बस्नेछ । सो बैठकमा पनि अर्थमन्त्री पौडेलले राजश्व र व्ययको वार्षिक अनुमानमाथि सामान्य छलफल गरियोस्’ भन्ने प्रस्ताव पेस गर्ने सो प्रस्तावमाथि छलफल प्रारम्भ गर्ने कार्यसूची छ ।

भिजिट भिषा प्रकरणमा गृहमन्त्री संलग्न रहेको आरोप लगाउँदै विपक्षी दलले गृहमन्त्रीले राजीनामा दिनुपर्ने अडान लिएपछि हिजो बस्ने भनिएको प्रतिनिधि सभाको बैठक स्थगित भएको थियो ।