काठमाडौं । हिमालयन बैंक लिमिटेडले थप सेयर (एफपीआ)े निष्काशन गर्ने भएको छ । बैंकले यही असार ३२ गतेदेखि १ अर्ब ४५ करोड २३ लाख २३ हजार रुपैयाँ बराबरको एफपिओ निष्कासन तथा बिक्री खुला गर्ने भएको हो ।
बैंकले प्रतिकित्ता १०० रुपैयाँ अंकित दरमा ५७ प्रिमियम थप गरी जम्मा रु। १५७ दरका ९२ लाख ५० हजार ४६९कित्ता एफपीओ जारी गर्न लागेको हो ।
बैंकको कुल चुक्ता पूँजी २१ अर्ब ६५ करोड ६६ लाख १५ हजार ६३१ रुपैयाँको ७२.९९ प्रतिशले हुन आउने संस्थापक समूहको १५ अर्ब ८० करोड ७१ लाख ६३ हजार ७४९ र २७.०१ प्रतिशले हुन आउने सर्वसाधारण समूहको ५ अर्ब ८४ करोड ९४ लाख ५१ हजार ८८१ रकमबराबरको सेयर कायम रहेको हुनाले बैंक तथा वित्तीय संस्था सम्बन्धी ऐन, २०७३ बमोजिम कुल जारी पूँजीको कम्तीमा ३० प्रतिशत सेयर सर्वसाधारणलाई छुट्याउनु पर्ने हुँदा एफपीओ जारी गर्न लागिएको बैंकले जनाएको छ ।
यो एफपीओमा लगानीकर्ताले छिटोमा साउन ४ गते र ढिलोमा साउन १४ गतेसम्म आवेदन दिन सक्नेछन् । एफपिओमा न्यूनतम १० कित्ताका लागि आवेदन दिनु पर्नेछ भने अधिकतममा सम्पूर्ण कित्तासम्मका लागि आवेदन दिन सकिनेछ ।
लगानीकर्ताले नेपाल धितोपत्र बोर्डबाट स्वीकृती प्राप्त गरेका सम्पूर्ण सि–आस्बा सदस्य बैंक तथा वित्तीय संस्थाहरु तथा मेरो सेयर मार्फत आवेदन दिन सक्नेछन्।
बैंकले उक्त एफपिओ निष्कासन तथा बिक्री प्रबन्धकका रुपमा सिटिजन्स क्यापिटल मार्केट लिमिटेडलाइ नियुक्त गरेकाे छ ।
एफपीओ निष्कासनका लागि केयर रेटिङ नेपालले बैंकलाई केयर–एनपी त्रिपल बी (आईएस)रेटिङ प्रदान गरेको छ। जसले समयमै वित्तीय दायित्व बहन गर्ने क्षमतामा मध्यम जोखिम रहेको जनाउँछ ।
प्रतिक्रिया दिनुहोस्