कार्यालय प्रमुखबाहेक अन्य पदमा ट्रेड युनियन गठनको अधिकार सुनिश्चित गर्न निजमति कर्मचारी संगठनको माग

काठमाडाैँ । नेकपा (एमाले) निकट नेपाल कर्मचारी संगठनले संघ, प्रदेश र स्थानीय तहका सबै कर्मचारीहरूलाई निजामति सेवामा समावेश गर्न माग गरेको छ ।

शहीद स्मृति दिवसका अवसरमा आयोजना हुने कार्यक्रमहरूको जानकारी दिन बिहीवार काठमाडौँमा पत्रकार सम्मेलनको आयोजना गर्दै संगठनले उक्त माग गरेको हो ।

कार्यालय सहयोगीबाहेक अन्य पदहरुमो ट्रेड युनियन गठनको अधिकार सुनिश्चित गरिनुपर्ने संगठनको माग छ । पत्रकार सम्मेलनमा बोल्दै संगठनका प्रवक्ता रामचन्द्र अधिकारीले संघीय निजामति सेवा विधेयकमार्फत कर्मचारीको तह र श्रेणी समायोजन, निवृत्तिभरण, करार सेवामा कार्यरत कर्मचारीहरुको स्थायीत्व लगायतका मागहरू सम्बोधन गरिनुपर्ने बताए ।

उनले विधेयकमार्फत कर्मचारीको हक र अधिकार सुनिश्चित हुनेमा आफू विश्वस्त रहेको पनि बताए ।

“संघ, प्रदेश र स्थानीय तहमा कार्यरत सबै कर्मचारीहरूलाई निजामतिको परिषामा समावेश गर्नुपर्ने, कार्यालय प्रमुख हुनेबाहेक आठौँ तहमुनिका कर्मचारीहरुरूको हकहितका लागि आधिकारिक ट्रेड युनियन गठन हुनुपर्ने, कुनैपनि पदमा पाँच वर्ष सेवा गरेको कर्मचारीको एक तह वृद्धि र दश वर्ष काम गरेको कर्मचारीको तोकिएको शैक्षिक योग्यता रहेको छ भने त्यस्ता कर्मचारीहरुलाई एक श्रेणी वृद्धि गरि तह मिलान गर्नुपर्ने संगठनको माग छ”, उनले भने ।

साथै संगठनले शहिद स्मृति दिवस २०८२ को अवसरमा विभिन्न कार्यक्रमहरुको आयोजना गर्ने जनाएको छ । २०४८ सालको ५६ दिने आन्दोलनका क्रममा शहीद भएकाहरूको स्मरणमा ‘शहीद मनोज, झपेन्द्र, सुरेन्द्र स्मृति दिवस’ मनाइने प्रवक्ता अधिकारीले बताए ।