नेपाल प्रहरीद्वारा अधिक भारवाहन गर्ने ट्रकमाथि कडाइ गर्ने निर्देशन

काठमाडौँ । नेपाल प्रहरी प्रधान कार्यालयले मालबाहक सवारी साधनमा अधिकतम भारभन्दा बढी सामान बोकेर सञ्चालनमा आएका ट्रक तथा अन्य सवारीमाथि कडाइ गर्न काठमाडौँ उपत्यका र प्रदेश प्रहरी कार्यालयहरूलाई निर्देशन दिएको छ।

राजमार्ग सुरक्षा तथा ट्राफिक व्यवस्थापन महाशाखाले आइतबार जारी गरेको परिपत्रमा “मालबाहक सवारी साधनको भारवाहन नियमन सम्बन्धी निर्देशिका, २०७४ (संशोधन सहित)” पूर्णरूपमा कार्यान्वयन गर्न भनिएको छ। परिपत्रमा उल्लेख गरिएअनुसार अबदेखि अधिक भार बोकेका ट्रकहरूलाई जरिवाना गरेर मात्र छोड्ने होइन, तोकिएकोभन्दा बढी सामान त्यहीँ अनलोड गरी अर्को सवारीमा सार्न बाध्य पारिनेछ।

एकपटकभन्दा बढी ओभरलोड गरेर ट्राफिक नियम उल्लङ्घन गर्ने सवारीलाई यातायात कार्यालयमा चलान गरी थप कारबाही प्रक्रिया अघि बढाउने पनि निर्देशनमा स्पष्ट उल्लेख छ। साथै, नियम कार्यान्वयनको अवस्था नियमित रूपमा अनुगमन गर्न र उल्लङ्घन गर्ने प्रहरी कर्मचारीहरूलाई समेत कारबाही गर्नुपर्ने व्यवस्था गर्न भनिएको छ।

यसैबिच नेपाल ट्रक व्यवसायी महासंघका अध्यक्ष हिरालाल श्रेष्ठको नेतृत्वमा हिजाे गएको प्रतिनिधिमण्डलले प्रहरी महानिरीक्षक (आईजीपी) दिपक थापालाई ज्ञापनपत्र बुझाउँदै ट्राफिक प्रहरीले जाँच गरे पनि न्यून जरिवानाका कारण समस्या समाधान नभएको गुनासो राखेको थियो।

महासंघले ओभरलोड गर्ने ट्रकहरूलाई यातायात कार्यालयमा चलान गर्न वा निर्देशन अनुसार सामान अनलोड गराई भार सन्तुलन मिलाउने व्यवस्था गर्न आग्रह गरेको थियो। साेही आधारमा नेपाल प्रहरीद्वारा अधिक भारवाहन गर्ने ट्रकमाथि कडाइ गर्ने निर्देशन दिएकाे हाे ।