काठमाडौंको पूर्वी क्षेत्रको उत्कृष्ट विद्यालय बाल गीताञ्जली, ६ विद्यार्थीले ल्याए ४ जिपिए

काठमाडौँ । काठमाडौँकाे कागेश्वरी मनोहरा नगरपालिकामा अवस्थित बाल गीताञ्जली माध्यमिक विद्यालयले २०८१ सालको माध्यमिक शिक्षा परीक्षा (एसईई) मा उल्लेखनीय सफलता प्राप्त गर्दै पूर्वी काठमाडौंकै उत्कृष्ट विद्यालयको रुपमा आफ्नो पहिचान कायम गरेको छ।

विद्यालयका अनुसार, यस वर्ष एसईईमा सहभागी भएका ४२ जना मध्ये ६ जना विद्यार्थीले ४.० जिपिए ल्याउन सफल भएका छन्। यसैसाथ, विद्यालयले शतप्रतिशत विद्यार्थी उत्तीर्ण गराउँदै कागेश्वरी मनोहरा नगरपालिकाभर ४ जिपिए ल्याउने एकमात्र विद्यालयको कीर्तिमानसमेत राखेको छ।

शनिबार विद्यालय परिसरमा आयोजित विशेष कार्यक्रममा एसईई उत्तीर्ण विद्यार्थीहरूलाई बधाई तथा शुभकामना दिँदै सम्मान गरिएको थियो। कार्यक्रममा विद्यालय प्रशासन, शिक्षक, अभिभावक र नगरपालिकाका जनप्रतिनिधिहरूको उपस्थिति रहेको थियो।

कार्यक्रमका प्रमुख अतिथि तथा कागेश्वरी मनोहरा नगरपालिकाका मेयर उपेन्द्र कार्कीले बाल गीताञ्जली विद्यालय नगर मात्र होइन, पूर्वी काठमाडौं क्षेत्रकै अनुकरणीय शैक्षिक संस्था भएको टिप्पणी गरे। विद्यालयले कमजोर शैक्षिक पृष्ठभूमिका बालबालिकालाई समेत सफलता दिलाउन सक्ने क्षमताको विकास गरेको भन्दै उनले संस्कार, संस्कृति र सीपमूलक शिक्षामा विद्यालय अग्रणी रहेको बताए। साथै, नगरपालिकाले सबै विद्यालयलाई समान रूपमा सहयोग गर्दै ‘नो एनजी’ अवधारणा लागू गर्ने योजना रहेको जानकारीसमेत दिए।

उपमेयर सान्ता थापाले बाल्यकालमै सहि र गलतबीच छुट्याएर निर्णय लिन सक्ने चेतनाको विकास गर्न आवश्यक रहेको उल्लेख गर्दै, गीताञ्जलीका विद्यार्थीहरूले अभिभावक र नगरपालिकाको शिर नझुक्ने गरी आचरण गर्ने विश्वास व्यक्त गरिन्। अनुशासन र मूल्यबोधले नै व्यक्तित्व निर्माण गर्ने हुँदा त्यसतर्फ विशेष ध्यान दिनुपर्ने उनको जोड थियो।

वडा नं. ६ का अध्यक्ष प्रकाश फ्युयाँलले एसईईपछि शैक्षिक यात्रा अझ फराकिलो हुने भएकाले विद्यार्थीहरूले अझ धेरै ज्ञान आर्जन गर्नुपर्ने बताए। उनले आर्थिक रुपमा कमजोर वर्गका बालबालिकाको शिक्षामा सुधार ल्याउन नगरपालिका प्रतिबद्ध रहेको र सामुदायिक विद्यालयको नतिजा उकास्ने प्रयासहरू पनि भइरहेको बताए।

विद्यालयको सफलतामा शिक्षकहरूको शिक्षण शैली, विद्यार्थीहरूप्रतिको व्यवहार र विद्यालयको समग्र वातावरणले महत्त्वपूर्ण भूमिका खेलेको अभिभावकहरूको भनाइ छ। अभिभावक महेश्वर चापागाईंले शिक्षक, विद्यार्थी र अभिभावकको सामूहिक प्रयासले विद्यालयले राम्रो नतिजा ल्याएको बताए।

४ जिपिए ल्याउने विद्यार्थीमध्येका विवेक अधिकारीले विद्यालयलाई दोस्रो घरको रूपमा अनुभूति गरेको भन्दै १० वर्ष लामो अध्ययन यात्रामा रमाइला पलहरू बिताएको स्मरण गरे। विद्यालयमा पारिवारिक वातावरण पाएको र शिक्षकहरूको माया, मार्गदर्शन र प्रेरणाले आफूलाई यो सफलतासम्म ल्याएको बताए।

विद्यालयका प्रधानाध्यापक महेन्द्र राज घिमिरेले यो सफलता विद्यार्थीको कडा मेहनत, शिक्षकहरूको समर्पण र अभिभावकहरूको साथले सम्भव भएको उल्लेख गरे। शिक्षकले बाटो देखाउने काम गर्ने भए पनि अन्ततः नतिजा विद्यार्थीको प्रयासमा भर पर्ने बताए।

कार्यक्रममा एसईईमा उत्कृष्ट प्रदर्शन गर्ने विद्यार्थीहरूका साथै विद्यालयका शिक्षक र कर्मचारीहरूलाई पनि सम्मान गरिएको थियो। बाल गीताञ्जली विद्यालयले यो सफलतामार्फत पूर्वी काठमाडौँ क्षेत्रमै प्रेरणादायी उदाहरण प्रस्तुत गरेको छ।