ब्राजिलले डब्ल्युटिओमा अमेरिकी करलाई चुनौती दिने, राहत प्याकेजको तयारी

ब्राजिलले वार्ताको ढोका खुला राख्दै विश्व व्यापार संगठन (डब्ल्युटिओ) मा नयाँ लगाइएको अमेरिकी करलाई औपचारिक रूपमा चुनौती दिने तयारी गरिरहेको अधिकारीहरूले बताएका छन् ।

अमेरिकी राष्ट्रपति डोनाल्ड ट्रम्पले बुधवारदेखि लागू हुनेगरी कफी, गाईको मासु र पेट्रोकेमिकल लगायत ब्राजिलका विभिन्न निर्यातमा ५० प्रतिशत कर लगाउने घोषणा गरेपछि यो कदम चालिएको हो ।

यो उपायले संयुक्त राज्य अमेरिकामा ब्राजिलको निर्यातको लगभग ३५ प्रतिशतलाई असर गर्छ । यद्यपि ऊर्जा उत्पादनहरू र केही खनिजहरू जस्ता प्रमुख उत्पादनहरूलाई बहिष्कृत गरिएको थियो ।

ब्राजिलको चेम्बर अफ फरेन ट्रेडले डब्ल्युटिओसँग औपचारिक परामर्श शुरु गर्ने प्रश्तावलाई अनुमोदन गरेको छ । जुन विवाद समाधान प्रक्रियाको पहिलो चरण हो । चेम्बरको मन्त्रिपरिषद्ले निर्णय राष्ट्रपति लुइज इनासियो लुला दा सिल्भालाई पठाएको छ । जसले व्यापार निकायमा कसरी र कहिले उजुरी पेश गर्ने भनेर निर्धारण गर्नेछन् ।

उपराष्ट्रपति गेराल्डो अल्कमिनले ब्राजिलले नयाँ करको प्रभाव कम गर्न काम गरिरहेको र रणनीतिहरू समन्वय गर्न कृषि व्यवसाय प्रतिनिधिहरूसँग भेट गरिसकेको बताए। 

सरकारले प्रभावित क्षेत्रहरूसँग वार्ता पनि जारी राख्ने उनकाे भनाइ छ । अर्थमन्त्री फर्नान्डो हद्दादले ब्राजिल वार्ताको लागि खुला रहेको तर असमान साझेदारी स्वीकार नगर्ने बताए ।