प्रधानमन्त्री ओली आज संसदमा सम्बोधन गर्दै

काठमाडौँ । प्रधानमन्त्री केपी शर्मा ओलीले आज प्रतिनिधि सभाको बैठकलाई सम्बोधन गर्ने भएका छन् । शनिबार चीन भ्रमणमा प्रस्थान गर्न लागेका प्रधानमन्त्री ओलीले त्यसअघि संसदमा सम्बोधन गरेर आफ्नो भ्रमणबारे जानकारी दिने कार्यक्रम रहेको छ ।

प्रधानमन्त्रीले चीन भ्रमणका एजेन्डासहित आगामी भारत भ्रमणका बारेमा पनि संसदलाई जानकारी दिने अनुमान गरिएको छ। साथै, सीमा विवाद र पछिल्लो राजनीतिक अवस्थाबारे समेत प्रधानमन्त्रीको सम्बोधनमा समेटिने स्रोतले जनाएको छ।

यसअघि बिहीबार सिंहदरबारमा बसेको प्रमुख सचेतकहरूसँगको छलफलमा सभामुख देवराज घिमिरेले प्रधानमन्त्रीको सम्बोधनबारे जानकारी गराएका थिए ।

भिजिट भिसा दुरुपयोग प्रकरणलाई लिएर लामो समयदेखि संसद बहिष्कार गर्दै आएको राष्ट्रिय स्वतन्त्र पार्टी (रास्वपा) ले भने आजको बैठकमा अवरोध नगर्ने र प्रधानमन्त्रीलाई सम्बोधन गर्न दिने निर्णय गरेको छ । प्रधानमन्त्रीको सम्बोधनप्रति सत्ता पक्षसँगै प्रतिपक्ष दलहरूकै चासो रहेको देखिन्छ।