अछाममा छाउ बार्न बारिमा सुतेका दुई जनाको ढुंगाले लागेर मृत्यु

काठमाडौं । अछाममा छाउ बार्न बारीमा पाल टाँगेर सुतेका दुई जनाको ढुंगाले लागेर मृत्यु भएको छ ।

हिजो (बिहीबार) राति पञ्चदेवल विनायक नगरपालिका– ८ को सेलापानीस्थित चुरखोलीमा ढुंगा खस्दा चेपिएर दुई जनाको मृत्यु भएको प्रहरीले जनाएको छ ।

छाउ बार्न घरभन्दा टाढा त्रिपाल टाँगेर तीनजना सुतेकै ठाउँमा पहिरो खसेको जिल्ला प्रहरी कार्यालय अछामका प्रहरी निरीक्षक टेकबहादुर बोहोराले जानकारी दिए।

‘पहिरोमा पुरिएर ३५ वर्षीया निमा खनाल र सात वर्षीया बालिका कविता भण्डारीको मृत्यु भएको छ। बालिकाकी आमा ३६ वर्षीया रत्ना भण्डारी घाइते भएको प्रहरीले जनाएको छ ।

घाइते भण्डारीको टाउकोमा गम्भीर चोट लागेको र अहिले उपचारका लागि नेपालगञ्ज रेफर गर्ने तयारी भइरहेको प्रहरी निरीक्षक बोहोराले जानकारी दिए।

दुवै महिला महिनावारी भएकाले घरदेखि टाढा खुला ठाउँमा त्रिपाल टाँगेर सुतेका थिए भने बालिका कविता पनि आमा रत्नासँगै सुतेकी थिइन् ।