सामाजिक सञ्जालमा ‘रोग निको पार्छ’ भनी प्रचार हुने आहारपूरक खाद्यबाट सावधान रहन विभागको आग्रह

काठमाडौँ । खाद्य प्रविधि तथा गुण नियन्त्रण विभागले सामाजिक सञ्जाल (फेस्बुक, रिल्स, इन्सटाग्राम, टिकटक) मार्फत आहारपूरक खाद्य पदार्थ सम्बन्धी भ्रामक प्रचार बढेको भन्दै आम जनतालाई सचेत रहन आग्रह गरेकाे छ ।

विभागका अनुसार हाल विभिन्न नामका आहारपूरक उत्पादनले ‘रोग निको पार्छ’ वा ‘विशेष रोगको उपचार गर्छ’ भन्ने दाबी गर्दै प्रचार गरेको पाइए पनि आहारपूरक खाद्य पदार्थको वास्तविक उद्देश्य केवल शरिरले खानपानबाट पूर्ति गर्न नसक्ने पौष्टिक तत्वहरू प्रदान गरेर सामान्य स्वास्थ्यमा सहयोग पुर्याउनु हो। यस्ता उत्पादनले कुनै रोगको उपचार वा निराकरण गर्न नसक्ने विभागले जनाएकाे छ ।

विभागले आहारपूरक व्यवसायीहरूलाई आफ्नो उत्पादन दर्ता नगरिकन वा भ्रामक प्रचार नगर्न सचेत गराउँदै उल्लंघन भएमा खाद्य स्वच्छता तथा गुणस्तर ऐन, २०८१ बमोजिम कानुनी कारवाही हुने चेतावनी दिएको छ।

साथै, उपभोक्तालाई सामाजिक सञ्जालमा देखिने रोग निदान गर्ने दाबी भएका आहारपूरक र न्यूट्रास्युटिकल्स खरीद नगर्न र उपभोग नगर्न पनि विभागले अनुरोध गरेको छ।