काठमाडौँ । स्वास्थ्य बिमा बोर्डका अध्यक्ष चन्द्रबहादुर थापाले केन्द्रको नीतिगत तथा कार्यगत सुधारलाई प्रभावकारी ढङ्गले कार्यान्वयन गर्न बोर्डका जिल्ला संयोजकहरूलाई निर्देशन दिएका छन् ।
सुदूरपश्चिम प्रदेशस्तरीय वार्षिक समीक्षा गोष्ठी कार्यक्रमलाई आज धनगढीमा सम्बोधन गर्दै केन्द्रले निर्णय गरेर मात्रै नहुने भन्दै जिल्ला संयोजकहरूले प्रभावकारी भूमिका खेल्न निर्देशन दिएका हु्न् ।
उनले भने,“हामीले स्वास्थ्य बिमालाई प्रभावकारी बनाउन नीतिगतरूपमा लागिरहेका छौँ । यसलाई जिल्ला तथा स्थानीय तहमा यहाँहरूले प्रभावकारी ढङ्गले कार्यान्वयन गर्नुभयो भनेमात्रै हामी सफल हुन्छौँ ।”
अध्यक्ष थापाले बोर्डका जिल्ला संयोजकहरूलाई स्थानीय सरकारसँग समन्वय गरेर स्वास्थ्य बिमालाई प्रभावकारी बनाउन जोड दिए ।
उनले सुदूरपश्चिम प्रदेशमा स्वाथ्य बिमामा आबद्धताको सङ्ख्या कम भएको भन्दै जनचेनामूलक काम गर्न तथा स्थानीय सरकारसँग मिलेर काम गर्न आग्रह गरे ।
गोष्ठीमा सुदूरपश्चिम प्रदेशका ९ ओटै जिल्लाका बोर्डका संयोजकहरूको उपस्थिति थियो । अध्यक्ष थापाले स्वास्थ्य बिमाको कारणले आएको प्रभाव र अवस्था के छ भन्ने विषयमा सर्वेक्षण भइरहेको समेत बताए ।
उनले कार्यक्रममा भने,“स्वास्थ्य बिमाको विकल्प छैन । यसबारे प्रश्नहरू पनि छन् त्यसैले हामीले यो दश वर्षको अवधिमा देखिएको प्रभाव के छ भन्ने विषयमा सर्वोक्षण गरिरहेका छौँ ।”
उनले अहिले आएका गुनासालाई समेत सम्बोधन हुने गरेर नीतिगत सुधारमा बोर्ड लागिरहेको जानकारी दिए । अध्यक्ष थापाले आफू आएको ४ महिने कार्यकालमा विभिन्न नीतिगत सुधारको काम भएको जानकारी दिए ।
अध्यक्ष थापाले प्रथम सेवा विन्दु परिवर्तन, कडा रोगमा थप रु एक लाखको सुविधा, बिमा सेवा सक्रिय गर्न लामो समय कुर्नु नपर्ने, अनिवार्य नविकरण गर्नुपर्ने, लक्षित वर्गको स्वत: नवीकरणको व्यवस्था खारेज, दाबी समीक्षामा तिब्रता लगायतका विषयमा काम भइसकेको जानकारी दिए । उनले आगामी सुधारको योजना समेत सुनाए ।
उनले स्वास्थ्य बीमालाई स्थायित्व प्रदान गर्न बोर्डको संगठन तथा व्यवस्थापन सर्वेक्षण तथा कर्मचारी प्रशासन विनियमावली स्वीकृतिमा जोड दिने, स्वास्थ्य बीमाको सर्भरको स्तरोन्नती, अनलाईन इनोरलमेन्ट, राष्ट्रिय परिचयपत्र लगाएतसँग अन्तरआवद्धता लगायतका समग्र सूचना प्रविधिमा सुधार गर्ने बताए ।
उनले सेवा प्रदायक स्वास्थ्य संस्थाको अनुगमनमा तिब्रता दिइने, वित्तीय स्थायित्व प्राप्तीका लागि नीतिगत तथा कार्यगत सुधार गर्ने समेत बताए ।
अध्यक्ष थापाले केन्द्रको नीतिगत तथा कार्यगत सुधारलाई आम जनतामा अनुभूति हुने गरेर बोर्डका जिल्ला संयोजकहरूले भूमिका खेल्नुपर्नेमा जोड दिए ।
प्रतिक्रिया दिनुहोस्