काठमाडौँ । राष्ट्रिय सभाका सांसदहरूले उखु किसानको अनुदान घटाउने निर्णय तत्काल खारेज गरी पुरानै दरमा उपलब्ध गराउन सरकारसँग माग गरेका छन्।
शुक्रबार राष्ट्रिय सभा बैठकको शुन्य समयमा सांसदहरूले सरकारलाई सचेत गराउँदै किसानलाई तत्काल राहत उपलब्ध गराउन ध्यान दिन आग्रह गरेका हुन् ।
सभामा बोल्दै प्रमुख प्रतिपक्ष दल नेकपा (माओवादी केन्द्र) की सांसद गंगाकुमारी बेल्वासेले सरकारले उखुमा दिँदै आएको अनुदान आधा घटाएको प्रति आपत्ति जनाउँदै पुरानै अनुदान उपलब्ध गराउन दबाब दिइन्।
उनले भनिन्, “उखु उत्पादनमा दिँदै आएको अनुदान आधा घटाइएको छ। गत मंसिर सरकारले उखुको न्यूनतम समर्थन मूल्य प्रतिक्विन्टल ५८५ निर्धारण गरेकोमा अहिले अनुदानको मूल्य आधा घटाइएको छ। सरकार पुरानै अनुदान तत्काल उपलब्ध गराओस्।”
यसैबिच सत्तारुढ एमालेका सांसद गोपाल भट्टराईले बाढी र पहिरोका कारण ठप्प परेको रसुवागढी नाका र तातोपानी भन्सार तत्काल सञ्चालनमा ल्याउन सरकारसँग माग गरे । उनले मुस्ताङको कोरोला नाकालाई वैकल्पिक नाका बनाउने काममा ढिलाई नगर्न पनि ध्यानाकर्षण गराए । सांसद भट्टराईले भने, “उत्तरतिरका नाकाहरु ठप्प हुँदा करिब ४ सय कन्टेनर रोकिएका छन्। छिटो ती नाकाहरु सञ्चालनमा ल्याउन सरकारको ध्यान आवश्यक छ।”
प्रतिक्रिया दिनुहोस्