ज्येष्ठ नागरिकको भत्ता प्रक्रिया सहज बनाउन सांसद गैरेको माग

काठमाडौँ । नेकपा (एमाले) का सांसद ठाकुर गैरेले देशभरका वडा कार्यालयमा जेष्ठ नागरिक तथा सामाजिक सुरक्षा भत्ता पाउँदा नागरिकहरूले भोग्नु परेको असुविधाप्रति सरकारको ध्यानाकर्षण गराएका छन् ।

प्रतिनिधि सभाको शुक्रबारको बैठकमा बोल्दै सांसद गैरेले बायोमेट्रिक प्रक्रियामा बारम्बार सर्भर डाउन हुने समस्याका कारण आम नागरिकले ठूलो कठिनाइ भोग्नुपरेको उल्लेख गरे। उनले सरकारले प्रयोग गरेको सर्भरको क्षमता र गुणस्तरमा प्रश्न उठाउँदै यसको समाधानको लागि आवश्यक कदम चाल्न माग गरे ।

उनले भने, “देशभरीका वडा कार्यालयमा ज्येष्ठ नागरिक र सामाजिक सुरक्षा भत्ता पाउँदै आएका नागरिकहरू बायोमेट्रिक गर्नका लागि धाइरहेका छन्। मैले भ्रमण गरेका धेरै वडामा अशक्त ज्येष्ठ नागरिकहरू घण्टौंसम्म लाइनमा पर्खिन बाध्य छन्। दुःखद कुरा के हो भने समस्या भए पनि जवाफ एउटै छ – ‘सर्भर डाउन भयो’। सरकारको सर्भर क्षमता पर्याप्त छैन कि गुणस्तरीय छैन ? यस विषयमा तत्काल कदम किन चालेको छैन ?”

उनले अशक्त र ज्येष्ठ नागरिकलाई घरमै पुगेर सेवा प्रदान गर्ने व्यवस्था मिलाउनुपर्नेछ र सर्भर समस्याको समाधान तत्काल खोज्नुपर्ने माग गरे ।