देशभर सामान्य बदलीः कर्णाली र सुदूरपश्चिममा मध्यम वर्षाको सम्भावना

काठमाडौँ । मनसुनको न्यून चापीय रेखा हाल पूर्वी भागमा सरदर स्थानभन्दा केही उत्तरतर्फ र पश्चिमी भागमा सरदर स्थानको आसपासमा अवस्थित भएको मौसम पूर्वानुमान महाशाखाले जनाएको छ । यसका कारण आज देशका विभिन्न भू-भागमा वर्षा हुने सम्भावना रहेको छ ।

महाशाखाका अनुसार आज दिउँसो देशभर सामान्यतया बदली रहनेछ । विशेषगरी कर्णाली र सुदूरपश्चिम प्रदेशको तराई तथा पहाडी भू-भागका केही स्थानमा मध्यम वर्षा हुन सक्नेछ ।

यस्तै बागमती र गण्डकी प्रदेशलगायतका बाँकी पहाडी भू-भागका केही स्थानमा र तराईका एक–दुई स्थानमा पनि वर्षा हुने पूर्वानुमान गरिएको छ ।

त्यसैगरी, आज राति पनि देशभर साधारणतया बदली रहने महाशाखाले जनाएको छ । सबै प्रदेशका पहाडी भू–भागका केही स्थानमा र तराईका थोरै स्थानमा मध्यम वर्षा हुने सम्भावना रहेको छ । मौसमविद्हरूले वर्षा हुने सम्भावनाका कारण सावधानी अपनाउन र आवश्यक तयारी गर्न सुझाव दिएका छन्।