काठमाडाैँ । सूर्यकुण्ड हाइड्रो इलेक्ट्रिक लिमिटेडले नुवाकोट जिल्लाको दुप्चेश्वर गाउँपालिकामा निर्माण सम्पन्न गरेको ११ मेगावाट क्षमताको माथिल्लो तादी खोला जलविद्युत आयोजना औपचारिक रूपमा व्यवसायिक उत्पादनमा प्रवेश गरेको छ।
कम्पनीका अनुसार आयोजना २०८२ असार १८ गते सम्पन्न भई १५ दिनको सफल परीक्षण सञ्चालनपछि २०८२ साउन १२ गतेदेखि नियमित रूपमा राष्ट्रिय प्रसारण प्रणालीमा बिजुली आपूर्ति गर्दै आएको छ।
ऊर्जा विकास र सञ्चालनको उद्देश्यले स्थापना भएको सूर्यकुण्ड हाइड्रो इलेक्ट्रिक लिमिटेडमा अपि पावर कम्पनी लिमिटेडको बहुमत सेयर लगानी रहेको छ।
यस आयोजनाले नेपाल विद्युत प्राधिकरणसँग २०६८ चैत ३ गते विद्युत खरिद सम्झौता गरेको थियो। साथै, २०७२ असोज २२ गते उत्पादन इजाजतपत्र र २०८१ असोज ८ गते ऊर्जा मन्त्रालयबाट वातावरणीय प्रारम्भिक अध्ययन स्वीकृति प्राप्त गरेको हो।
वाग्मती प्रदेश, नुवाकोट जिल्लाको दुप्चेश्वर गाउँपालिकामा अवस्थित आयोजनाको इन्टेक करिब १५०० मिटर र पावरहाउस १२८२ मिटर उचाइमा रहेको छ। पावरहाउसमा जडान गरिएका दुईवटा पेल्टन टर्बाइन (प्रत्येक ५-५ मेगावाट) मार्फत कुल ११ मेगावाट विद्युत उत्पादन हुने गरी आयोजना डिजाइन गरिएको हो। डाइभर्सन बाँध र सहायक संरचना १०० वर्षको पुनरावृत्तिमा आउने २४७ घनमिटर प्रति सेकेन्ड बराबरको बाढीलाई समेत सामना गर्न सक्ने गरी तयार पारिएको छ।
यस आयोजनाबाट उत्पादित बिजुली नुवाकोटकै समुन्द्रटार सबस्टेशनसँग जोडिएको स्विचयार्डमार्फत ६ किलोमिटर लामो ३३ केभी ट्रान्समिशन लाइनद्वारा राष्ट्रिय ग्रिडमा आपूर्ति भइरहेको छ। आयोजना मार्फत वार्षिक ६१.३१९ गीगावाटघण्टा विद्युत उत्पादन हुने अनुमान गरिएको छ, जसमा वर्षायाममा ५०.८९३ गीगावाटघण्टा र सुख्खा मौसमी अवधिमा १०.४२५ गीगावाटघण्टा उत्पादन हुने अनुमान छ।
यसैबिच कम्पनीको प्राथमिक सेयर निष्कासन प्रक्रिया अघि बढिसकेको र हाल नेपाल धितोपत्र बोर्डको पाइपलाइनमा रहेको छ। सफलतापूर्वक सञ्चालनमा आएको यो आयोजना वाग्मती प्रदेशसहित राष्ट्रिय विद्युत आपूर्तिमा महत्वपूर्ण योगदान पुर्याउने अपेक्षा गरिएको छ।
प्रतिक्रिया दिनुहोस्