काठमाडौं । नारायणी डेभलपमेन्ट बैंक लिमिटेडले हकप्रद सेयर निष्काशन गर्ने भएको छ । बैकले असोज २ गतेदेखि शतप्रतिशत हकप्रद सेयर निष्काशन गर्न लागेको हो । बैंकले हाल कायम १ कित्ता सेयर बराबर नयाँ १ कित्ता (१ः१)अनुपातमा हकप्रद सेयर निष्काशन गर्न लागेको हो ।
यस अनुसार बैंकले २६ करोड २४ लाख ६७ हजार ६०० रुपैयाँबराबरको प्रतिसेयर १०० रुपैयाँ अंकित मूल्यका २६ लाख २४ हजार ६७६ कित्ता हकप्रद सेयर निष्काशन गर्नेछ ।
बैंकले हकप्रद सेयर निष्काशन गर्नको लागि नेपाल धितोपत्र बोर्डबाट साउन १५ गते अनुमति प्राप्त गरेको थियो ।
बैंकले हकप्रद सेयर निष्कासन प्रयोजनका लागि गत भदौ ९ गते एक दिनका लागि बुक क्लोज गरेको थियो । यसर्थ, भदौ ८ गतेसम्म नेप्सेमा कारोबार भई कायम भएका सेयरधनीहरु मात्रै कम्पनीद्वारा जारी गरिने हकप्रद खरिदका लागि योग्य हुनेछन् ।
लगानीकर्ताले उक्त हकप्रदमा आवेदन दिने अन्तिम मिति असोज २२ गतेसम्म आवेदन दिन सक्नेछन् ।
लगानीकर्ताले बिक्री प्रबन्धक ग्लोबल आइएमई क्यपिटलका साथै ग्लोबल आइएमई नवलपरासीस्थित भूमरी शाखा र नारायणी डेभलपमेन्ट बैंकको केन्द्रीय कार्यालय तथा यज्ञपुरी शाखा, टाँडी शाखा, चितवन पर्सा शाखा र नारायणगढ शाखा कार्यालय, नेपाल धितोपत्र बोर्डबाट इजाजत प्राप्त सि–आस्बा सेवामा सहभागी बैंक तथा वित्तीय संस्था तथा ‘मेरो सेयर’ बाट समेत आवेदन दिन सक्नेछन्।
बैंकलाई हकप्रद निष्कासनका लागि रेटिङ प्रदापक कम्पनी इक्रा नेपालले ‘इक्रा एनपी इस्योर रेटिङ सी प्लस रेटिङ’ प्रदान गरेको छ। जसले समयमै वित्तीय दायित्व बहन गर्ने क्षमतामा उच्च जोखिम रहेको जनाउँछ ।
बैंकको हकप्रद निष्कासन तथा बिक्री प्रबन्धकको रुपमा ग्लोबल आइएमई क्यापिटल लिमिटेड रहेको छ ।
प्रतिक्रिया दिनुहोस्