काठमाडाैँ । सञ्चार तथा सूचना प्रविधिमन्त्री पृथ्बीसुब्बा गुरुङले पुस्तकालयलाई अनुसन्धान, नवप्रवर्धन र सीप विकासको प्रमुख केन्द्रका रूपमा विकास गर्नुपर्ने आवश्यकता औंल्याएका छन् ।
आइतबार काठमाडौँमा आयोजित १८औँ पुस्तकालय दिवसका अवसरमा बोल्दै मन्त्री गुरुङले विशेषगरी ग्रामीण क्षेत्रका पुस्तकालयमा कम्प्युटर, इन्टरनेट, डिजिटल प्रणाली र मोबाइल पुस्तकालयजस्ता सुविधा विस्तार हुँदै गएको र यसले सूचना पहुँचमा रहेको खाडललाई पुरिरहेको बताएका हुन्।
उनका अनुसार पुस्तकालय केवल अध्ययनका स्थल मात्र नभई नागरिक चेतना जगाउने केन्द्र, सामाजिक संवादको चौतारी र परिवर्तनको प्रेरणाश्रोतका रूपमा स्थापित हुँदै आएका छन्।
मन्त्री गुरुङले पुस्तकालयलाई अझ सक्षम बनाउन कानूनी संरचना, पर्याप्त लगानी र प्रविधिको आवश्यकता रहेको भन्दै यसमा सरकार, स्थानीय तह र समुदायबीचको सहकार्य अपरिहार्य भएको उल्लेख गरे।
उनले पुस्तकालय महिला, बालबालिका, किसान, श्रमिक, विद्यार्थी लगायत समाजका सबै तहका नागरिकका लागि सूचना, सीप र आत्मबल प्रदान गर्ने साझा केन्द्र भएको पनि प्रष्ट पारे।
उनले भने, “युवाहरूका लागि पुस्तकालय अनुसन्धान, नवप्रवर्द्धन र सीप विकासको प्रमुख स्थल बनेका छन्। ग्रामीण क्षेत्रका पुस्तकालयमा प्रविधि र डिजिटल सेवाको विस्तारसँगै सूचना पहुँचमा ठूलो सुधार भएको छ। तर कानूनी आधार, बजेट र प्रविधिको कमीका कारण पुस्तकालय अझै पूर्ण क्षमतामा पुग्न सकेका छैनन्। अब सरकार, स्थानीय तह र समुदाय मिलेर पुस्तकालयलाई सशक्त बनाउन आवश्यक छ।”
मन्त्री गुरुङले पुस्तकालय सुधारमार्फत पठन संस्कृतिको विकासलाई सरकार प्राथमिकताका साथ अघि बढाइरहेको पनि जानकारी दिए।
प्रतिक्रिया दिनुहोस्