काठमाडाैँ । मानव अंग मिर्गौला बेचविखनमा संलग्न सात जनाको गिरोहलाई नेपाल प्रहरीले पक्राउ गरेको छ।
मानव बेचविखन अनुसन्धान ब्युरोले आइतबार काठमाडौँमा पत्रकार सम्मेलन गरी सो जानकारी दिएको हो। भारतको नयाँ दिल्लीमा बसेर गैरकानूनी कार्य सञ्चालन गर्दै आएका सिन्धुपाल्चोकका श्यामकृष्ण भण्डारीलाई महेन्द्रनगरबाट र उनको सहयोगी सुजन भारतीलाई वीरगञ्जबाट पक्राउ गरिएको ब्युरोका प्रमुख प्रहरी वरिष्ठ उपरीक्षक कृष्णप्रसाद पंगेनीले जानकारी दिए।
प्रहरीका अनुसार उक्त गिरोहले पैसाको प्रलोभनमा पारेर काठमाडौं, नुवाकोट, काभ्रेपलाञ्चोक, धादिङलगायतका जिल्लाका सर्वसाधारणलाई भारतको नयाँ दिल्ली लगेर अवैध रूपमा मिर्गौला प्रत्यारोपण गर्ने गरेको तथ्य फेला परेको छ।
प्रहरी वरिष्ठ उपरीक्षक पंगेनीले भने, “गत साउन २० गते तीन जना प्रतिवादी पक्राउ परेका थिए। त्यसपछि पाँच जना पीडितले जाहेरी दिएका छन्। अनुसन्धानका क्रममा यो गिरोह भारतको दिल्लीबाट परिचालित भई नेपाली नागरिकको मिर्गौला निकाल्ने र त्यसको कारोबार गर्ने गरेको पाइएको छ।”
यस विषयमा ‘अपरेशन शिल्ड’ नाम दिइएको अभियानमार्फत अनुसन्धान अघि बढाइएको र हालसम्म चार वटा मुद्दा दर्ता भइसकेको पनि प्रहरीले जनाएको छ। सो गिरोहले गरिबीको फाइदा उठाएर पैसाको प्रलोभन देखाई मानिसलाई मिर्गौला बेच्न बाध्य पारेको प्रमाण समेत जुटाइएको प्रहरीको दाबी छ।
भण्डारी सुनकोशी गाउँपालिका–७, सिन्धुपाल्चोकका ३८ वर्षीय हुन्। उनी लामो समयदेखि दिल्लीमै बस्दै गैरकानूनी रुपमा अंग बेच्ने कार्य गर्दै आएका थिए। उनका सहयोगी इन्द्रावती गाउँपालिका–२, सिन्धुपाल्चोकका २९ वर्षीय सुजन भारती पनि दिल्लीमै रहेर भण्डारीलाई सहयोग गर्दै आएका थिए। भण्डारीलाई महेन्द्रनगर र भारतीलाई वीरगञ्जबाट पक्राउ गरिएको प्रहरीले जनाएको छ।
यसअघि पनि सोही मुद्दामा तीन जना पक्राउ परिसकेको र हालसम्म सात जनालाई नियन्त्रणमा लिएर अनुसन्धान अघि बढाइएको प्रहरीले जनाएको छ।
गिरोहलाई संगठित अपराध ऐन अन्तर्गत कारबाही अघि बढाइएको छ। सो ऐनअनुसार मानव बेचविखन वा अवैध अंग व्यापारमा संलग्नलाई १० वर्षसम्म कैद र दुई लाख रुपैयाँसम्म जरिवाना गर्ने व्यवस्था रहेको पनि प्रहरी वरिष्ठ उपरीक्षक पंगेनीले जानकारी दिए ।
प्रतिक्रिया दिनुहोस्