काठमाडाैँ । सञ्चार तथा सूचना प्रविधिमन्त्री पृथ्वीसुब्बा गुरुङले सरकारले तयार पारेको डिजिटल नेपाल फ्रेमवर्क कार्यान्वयनको अन्तिम चरणमा पुगेको बताएका छन्।
चलचित्र विकास बोर्डको २५ औँ वार्षिकोत्सव तथा रजत जयन्ती समारोहमा बोल्दै उनले चाँडै मन्त्रिपरिषद्बाट पारित गरी उक्त फ्रेमवर्क लागू गरिने जानकारी दिएका हुन् ।
मन्त्री गुरुङका अनुसार डिजिटल नेपाल नीतिअन्तर्गत पर्यटन, शिक्षा, सुशासन, विपद् व्यवस्थापनलगायत आठ क्षेत्रलाई प्रविधिमार्फत सुदृढ बनाउने सरकारको योजना छ।
उनले कृत्रिम बुद्धिमत्ता (एआई) को प्रभावकारी प्रयोगका लागि पाँचौँ पुस्ताको दूरसञ्चार प्रविधि (फाइभजी) अनिवार्य भएको उल्लेख गर्दै माघ महिनाभित्र काठमाडौँ उपत्यका र पोखरा उपत्यकामा फाइभजी परीक्षण सुरू हुने बताए।
उनले भने, “हामी डिजिटल नेपालको फ्रेमवर्कलाई अब क्याबिनेटबाट पारित गरेर कार्यान्वयनमा लैजाने तयारीमा छौं। एआईको प्रयोगलाई तीव्रता दिन फाइभजी नेटवर्क अपरिहार्य छ। यस वर्ष परीक्षण सुरु गरेर अर्को वर्षभित्र देशभर विस्तार गर्ने सरकारको लक्ष्य छ।”
यससँगै, सातै प्रदेशमा आईटी डाटा सेन्टर र एआई केन्द्र स्थापना गर्ने तयारी भइरहेको मन्त्री गुरुङले स्पष्ट पारे। उनले बैंकिङ ठगीका मुद्दा बढ्दो अवस्थामा रहेको उल्लेख गर्दै त्यसको नियन्त्रणका लागि आवश्यक कानूनी संरचना बनाउन सरकार अघि बढेको जानकारी समेत दिए।
प्रतिक्रिया दिनुहोस्