काठमाडौँ । खोटाङको हलेसी तुवाचुङ नगरपालिका–४, बडहरेस्थित श्री लक्ष्मी माध्यमिक विद्यालयको भवन निर्माण कार्यमा भ्रष्टाचार भएको आरोपमा तत्कालीन जिल्ला शिक्षा अधिकारी डा. गणेश प्रसाद भट्टराई, केशव प्रसाद दाहाल, ज्ञानमणि नेपालसहित १३ जनाविरुद्ध विशेष अदालत काठमाडाैँमा आरोपपत्र दायर गरिएको छ।
विशेष अदालतमा दायर गरिएको आरोपपत्रअनुसार आ.ब. २०७१/७२ मा विद्यालयको चार कोठे आरसीसी भवन निर्माणका लागि जिल्ला शिक्षा कार्यालय, खोटाङले २४ लाख रुपैयाँ विनियोजन गरेको थियो।
साथै विद्यालयले २५ प्रतिशत जनश्रमदानसहित कुल ३० लाख रुपैयाँ लागत अनुमान गरिएको थियो। उक्त सम्झौता २०७१ फागुन २२ गते जिल्ला शिक्षा कार्यालय र विद्यालयबिच भएको थियो।
तर, सम्झौताको शर्त विपरीत रकम निकासा गरिएको र प्राविधिक प्रतिवेदनअनुसार फिल्डमा करिब २ लाख ७२ हजार रुपैयाँ बराबरको मात्र काम भएको खुलेको छ। आरोपपत्रमा भवन निर्माण कार्य नगरेको अवस्थामै झुटा बिल भरपाई पेश गरी २४ लाख रुपैयाँ भुक्तानी लिइएको/दिलाइएको उल्लेख छ।
अनुसन्धानपछि राष्ट्रसेवक कर्मचारी र विद्यालय व्यवस्थापन समितिका पदाधिकारीबीच मिलेमतो गरी व्यक्तिगत लाभ लिएको र विद्यालयलाई हानि पुर्याउने बदनियतका साथ भ्रष्टाचार गरिएको ठहर गरिएको छ।
प्रवक्ता राजेन्द्र कुमार पौडेलले आज विशेष अदालत काठमाडौँमा दायर गरिएको सो आरोपपत्रमार्फत संलग्न सबै प्रतिवादीलाई कानुन बमोजिम सजायको माग गरिएको जानकारी दिएका छन्।
प्रतिक्रिया दिनुहोस्