काठमाडौँ । निजी विद्यालय सङ्गठनहरू-प्याब्सन, नेसनल प्याब्सन, हिसान, अपेन र एनएमएले शिक्षा, स्वास्थ तथा सूचना प्रविधि समितिबाट पारित भएको शिक्षा विधेयकमा निजी विद्यालयविरुद्धका प्रावधान रहेको भन्दै आन्दोलनका कार्यक्रमलाई निरन्तरता दिने घोषणा गरेका छन् ।
आन्दोलनअन्तर्गत देशभरका विद्यालय बसहरू भदौ १६ गते र्यालीमा सहभागी हुने भएका छन् ।
संयुक्त विज्ञप्तिमा शिक्षा विधेयक संशोधनका मागलाई बल दिनका लागि विद्यालय बस र्याली आयोजना गरिएको उल्लेख गरिएको छ ।
आन्दोलनमा सातै प्रदेश, सबै जिल्ला, पालिका कार्यसमिताका पदाधिकारी तथा सदस्य विद्यालयका संस्थापक तथा प्रिन्सिपलहरूलाई सक्रिय रूपमा सहभागी हुन आह्वान गरिएको छ ।
काठमाडौं उपत्यकाभित्रका विद्यालय बसहरूलाई विभिन्न चोकबाट प्रवेश गरी चक्रपथ परिक्रमा गर्ने गरी रूट निर्धारण गरिएको छ ।
भक्तपुर, कागेश्वरी, पेप्सीकोला, तिनकुने, नरेफाट, जडीबुटी र बानेश्वर क्षेत्रका विद्यालय बसहरू कोटेश्वर चोकमा जम्मा भई सातदोबाटो हुँदै चक्रपथ परिक्रमा गर्नेछन् ।
ललितपुरका विद्यालय बसहरू सातदोबाटोबाट प्रवेश गरी एकान्तकुना हुँदै चक्रपथ घुम्नेछन् भने त्रिपुरेश्वर, टेकु, कालिमाटी र कीर्तिपुर क्षेत्रका विद्यालय बसहरू बल्खुबाट प्रवेश गरी कलंकी हुँदै चक्रपथ परिक्रमा गर्नेछन् ।
यस्तै, चन्द्रागिरि र थानकोट क्षेत्रका विद्यालय बसहरू कलंकी प्रवेश गरी सितापाइला हुँदै चक्रपथ घुम्ने, वाफल, सितापाइला, स्वयम्भु क्षेत्रका बसहरू हलचोक प्रवेश गरी सानोभ¥याङ हुँदै परिक्रमा गर्ने, तारकेश्वर र आसपासका विद्यालय बसहरू बालाजु प्रवेश गरी सामाखुशी हुँदै घुम्ने व्यवस्था गरिएको छ ।
टोखा, गोंगबु, ठमेल र आसपासका विद्यालय बसहरू सामाखुशी हुँदै धापासीतर्फ प्रवेश गर्नेछन् भने बुढानिलकण्ठ, महाराजगञ्ज, पानीपोखरी, बालुवाटारलगायतका विद्यालय बसहरू नारायणगोपालचोक हुँदै चावहिलतर्फ जानेछन् ।
कपन, जोरपाटी, गोकर्णेश्वरलगायतका बसहरू चावहिल प्रवेश गरी गौशला हुँदै चक्रपथ परिक्रमा गर्ने र गौशला, रातोपुल, बत्तीसपुतली, पुरानो बानेश्वर, मैतीदेवीलगायत क्षेत्रका विद्यालय बसहरू गौशला चोक प्रवेश गरी एयरपोर्ट–सिनामंगल हुँदै चक्रपथमा सहभागी हुनेछन् ।
विज्ञप्तिअनुसार विद्यालय बसहरूमा व्यानर र कालो झण्डा राखिनेछ र बिहान ठीक ११:३० बजेबाट बस र्याली सुरु हुनेछ । र्यालीलाई व्यवस्थापन गर्ने जिम्मेवारी प्रदेश पदाधिकारी, उपत्यकाका जिल्ला अध्यक्ष र नगर अध्यक्षलाई तोकिएको छ । सबै विद्यालय बसहरूले चक्रपथलाई घडी घुम्ने दिशामा परिक्रमा गर्नेछन् ।
संयुक्त विज्ञप्तिमा आन्दोलनका कार्यक्रमलाई सफल बनाउन हालसम्म दिएको योगदानप्रति धन्यवाद ज्ञापन गर्दै अझै सक्रियता देखाउन आग्रह गरिएको छ ।
विज्ञप्तिमा एनएमए अध्यक्ष पवित्रा लिम्बु, अपेन अध्यक्ष बढी दाहाल, हिसान कार्यवाहक अध्यक्ष युवराज शेर्मा, नेशनल प्याब्सन अध्यक्ष सुवाष न्यौपाने र प्याब्सन अध्यक्ष कृष्णप्रसाद अधिकारीले हस्ताक्षर गरेका छन् ।
प्रतिक्रिया दिनुहोस्