काठमाडौँ । उपत्यकामा फोहोर व्यवस्थापनमा गम्भीर सङ्कट उत्पन्न भएपछि सहरी विकासमन्त्री कुलमान घिसिङले बञ्चरेडाँडास्थित ल्याण्डफिल्ड साइटको अनुगमन गरेका छन्।
उपत्यकाका सडकहरू फोहोरले दुर्गन्धित भइरहेका बेला मन्त्री घिसिङले स्थानीय प्रशासन, फोहोर व्यवस्थापनसम्बन्धी अधिकारीहरू र स्थानीय प्रतिनिधिहरूसँग छलफल गर्दै समस्या समाधानको उपाय खोज्ने प्रयास गरेका हुन्।
काठमाडौं महानगरपालिका र अन्य स्थानीय तहहरूबाट दैनिक झन्डै १ हजार २ सय टनभन्दा बढी फोहोर उत्पादन हुने उपत्यकामा सिसडोल ल्याण्डफिल्ड साइटको क्षमता सिमित हुँदै गएपछि बञ्चरेडाँडा वैकल्पिक स्थलको रूपमा विकास गरिएको थियो।
विगतका वर्षहरूमा यहाँको पूर्वाधार अभाव, वातावरणीय असर र स्थानीय विरोधका कारण फोहोर व्यवस्थापन प्रभावकारी हुन सकेको छैन।
अनुगमनका क्रममा मन्त्री घिसिङले फोहोर विसर्जनको प्रक्रिया, वातावरणीय प्रभाव, र स्थानीयहरूको मागबारे विस्तृत जानकारी लिएका छन्।
स्थानीयहरूले फोहोरका कारण माटो र पानी प्रदूषित भएको, स्वास्थ्य जोखिम बढेको र सडक अवरोध भइरहेका गुनासो गर्दै आएका छन्।
सन् २०८० मा गरिएको एक अध्ययनले बञ्चरेडाँडा क्षेत्रमा फोहोरका कारण माटो र पानीमा प्रदूषण बढेको र त्यसले स्थानीय किसानको उत्पादनमा असर पारेको निष्कर्ष निकालेको थियो। स्थानीयहरूले विगतमा सरकारले गरेको १८ बुँदे सहमति कार्यान्वयन नभएको भन्दै पटक–पटक विरोध गर्दै आएका छन्।
मन्त्री घिसिङले अनुगमनपछि फोहोर छुट्याउने प्रक्रिया कडाइका साथ लागू गर्न, स्थानीयहरूसँग भएका सहमति कार्यान्वयन गर्न, र फोहोर व्यवस्थापनलाई दीगो बनाउन आवश्यक पूर्वाधार निर्माणमा जोड दिने प्रतिबद्धता जनाएका छन्।
प्रतिक्रिया दिनुहोस्