काठमाडाैँ । नेकपा एमालेले एघारौं महाधिवेशनका लागि आज देशैभरि प्रतिनिधि छनोट प्रक्रिया सञ्चालन गरिरहेको छ । पार्टी केन्द्रीय कार्यालयका अनुसार मंसिर ११ गते उम्मेदवारी मनोनयन सम्पन्न भइसकेपछि विभिन्न निर्वाचन क्षेत्रमा सहमति जुटाउने प्रयास जारी थियो ।
सहमति कायम गर्न नसकिएका क्षेत्रमा भने आज बिहान ८ बजेबाट मतदान सुरु भएको छ । अधिकांश जिल्लामा मतदान समय दिउँसो २ बजेसम्म तोकिएको छ भने केही जिल्लाले स्थानीय आवश्यकता अनुसार समय निर्धारण गरेका छन् ।
केन्द्रीय प्रचार तथा प्रकाशन विभाग प्रमुख राजेन्द्र गौतमका अनुसार संघीय निर्वाचन क्षेत्रबाट खुला, महिला, दलित र युवा गरी झण्डै २ हजार प्रतिनिधि चयन हुँदैछन् ।
यस्तै प्रवास, विभाग तथा जनसंगठित थरूहट, बागमती, जनसंगठन र विभिन्न संरचनाबाट थप करिब १०० प्रतिनिधि चयन हुनेछन् । यसरी मनोनित तथा निर्वाचित गरी एमालेको एघारौं महाधिवेशनमा करिब २२ सय प्रतिनिधि सहभागी हुने अनुमान गरिएको छ ।
प्रतिनिधि छनोटका लागि केन्द्रीय संगठन विभागले तयार पारेको प्रस्तावलाई सचिवालयले पहिले नै पारित गरी मातहतका कमिटीमा पठाइसकेको छ ।
सचिवालयको मंसिर १५ गतेको निर्णय अनुसार प्रतिनिधिसभा क्षेत्रलाई आधार मानी प्रति १२०० सदस्यबाट खुलातर्फ दुई र महिलातर्फ एक प्रतिनिधि निर्वाचित गर्नुपर्ने व्यवस्था छ । त्यसमध्ये एक प्रतिनिधि अनिवार्य रूपमा ४० वर्षभन्दा कम उमेरका युवा हुनुपर्छ ।
त्यस्तै, प्रति ८ सय सदस्यबाट एक महिला प्रतिनिधि निर्वाचित गरिनेछ । दलितका लागि भने प्रति ५ सय सदस्यबाट एक प्रतिनिधि चयन गर्ने विधि तय गरिएको छ। ट्रेड युनियन संरचनामा प्रत्येक प्रदेशबाट सात–सात जना प्रतिनिधि रहनेछन् ।
महासङ्घीय ढाँचामा रहेका जनसंगठनहरूले सात–सात जना र सामान्य जनसंगठनहरूले पाँच–पाँच जनाको प्रतिनिधित्व गर्ने व्यवस्था गरिएको छ ।
विभाग र कार्यालयबाट एक–एक जनाको प्रतिनिधित्व रहनेछ भने प्रवासबाट महादेशअनुसार पाँच–पाँच प्रतिनिधि रहनेछन्। यससँगै केन्द्रीय कमिटीका ३५४ सदस्य स्वतः प्रतिनिधि हुने व्यवस्था छ ।
अनुशासन आयोगबाट २९, लेखा आयोगबाट ३०, निर्वाचन आयोगबाट २५ र सल्लाहकार परिषद्बाट २५ सहित यी निकायबाट मात्र ४६४ जना प्रतिनिधि रहनेछन् ।
एमालेको कुल संगठित सदस्य संख्या ६ लाख ६७ हजार ६३० छ । यसमध्ये प्रदेश संरचनाबाट ४५, संघीय निर्वाचन क्षेत्रबाट करिब ९७०, विशेष जिल्लाबाट ४७, दलित संरचनाबाट ८१, ट्रेड युनियनबाट ४९, प्रवास र केन्द्रीय विभाग/कार्यालय तथा जनसंगठनहरूबाट गरी १९ सयभन्दा बढी प्रतिनिधि रहने अनुमान गरिएको छ। पाँच प्रतिशत प्रतिनिधि केन्द्रीय कमिटीले मनोनयन गर्ने व्यवस्था पनि छ ।
यी सबै समायोजनपछि आगामी एघारौं महाधिवेशनमा २१ सयभन्दा बढी प्रतिनिधि सहभागी हुने अपेक्षा गरिएको गौतमले बताए । उनका अनुसार पछिल्लो निर्णयअनुसार केही संरचनाबाट प्रतिनिधि थप हुने भए पनि समग्र अनुपात भने घटाइएको छ। एमालेको एघारौं महाधिवेशन मंसिर २७ देखि २९ गतेसम्म काठमाडौंमा आयोजना हुने कार्यक्रम रहेको छ।
प्रतिक्रिया दिनुहोस्