काठमाडाैँ । लामो समयदेखि विवाद र विभाजनमा फसेको गैरआवासीय नेपाली संघ (एनआरएनए) अब एकीकृत हुने भएको छ ।
संघको आइतवार काठमाडौँमा एकता घोषणा कार्यक्रम गर्न लागिएको हो । करिव चार वर्षदेखि विभाजनमा रहेको गैरआवासीय नेपाली संघ विभाजनमा रहेको छ ।
हाल विभाजित संघमा डा. बद्री केसी र महेश श्रेष्ठले नेतृत्व गरिरहेका छन् । १० औँ महाधिवेशनबाट शुरु भएको सदस्यतासम्बन्धी विवादले संघ विभाजनमा पुगेको थियो । हाल दुवै संघका अध्यक्ष संघलाई एकतावद्ध गर्न तयार भएका छन् । डा. केसी नेतृत्वका संघका उपमहासचिव तथा वार्ता समिति सदस्य सोम सापकोटाले करिब चार वर्षदेखि चल्दै आएको आन्तरिक विवाद अन्त्य गरि संघले आइतवार वृहत एकता घोषणा गर्न लागेको जानकारी दिए।
सापकोटाकाअनुसार आइतवार प्रधानमन्त्री सुशीला कार्कीको रोहवरमा वृहत एकता घोषणा हुन लागेको हो । एनआरएनए विदेशस्थित नेपालीहरूको साझा संस्था भएकाले यसको दर्ता परराष्ट्र मन्त्रालयअन्तर्गत रहेको छ । हाल परराष्ट्र मन्त्रालयको जिम्मेवारी प्रधानमन्त्रीले नै सम्हालेको कारण उनकाे पस्थितिमा एकता घोषणा गर्न लागिएको सापकोटाले जानकारी दिए ।
उनले गैरआवसिय नेपालीहरुको दबाब र ईच्छाअनुसार नै एकता गरिएको जानकारी दिए । उनले १० औँ महाधिवेशनमा पञ्जीकृत सदस्य र प्रतिनिधि निर्धारण सम्बन्धि विधानको पालना गर्न नसक्दा विवाद उत्पन्न भएको जानकारी दिए ।
विधानअनुसार हरेक १० पञ्जीकृत सदस्यमा १ प्रतिनिधि तोकिने व्यवस्था रहेपनि केही देशमा उक्त प्रक्रिया अवहेलना गरिएको उनको भनाइ छ । यसले विवादलाई जटिल बनाउँदै लगेर विभाजनसम्म पु¥याएको उनले बताए ।
उनले राजनितिक प्रभाव, व्यक्तिगत ईगो र केही त्रुटिहरु सम्बोधन गर्न नसकेर अरुलाई दोष दिन थाल्दा संघमा विभाजन भएको उल्लेख गर्दै विभाजले कसैलाई पनि फाइदा नपुगेको बताए। संगठनमा भएको विभाजनले संगठनका साथै देशलाई पनि ठुलो घाटा लागेको उनकाे भनाइ छ ।
छोटो समयमा संघले गैरआवासीय नेपाली र राज्यले गरेको विश्वासलाई चुक्न नदिन फेरि एक हुने वातावरण निर्माण गरेको उनले जानकारी दिए । उनले एकताको महसुस गरेर नै दुबै समुहका अध्यक्षहरू, संघका पुर्व पदाधिकारीहरूको छलफलले एकता वार्ता समितिको गठन गरी संघलाई एकतावद्ध बनाउन लागेको बताए । उनकाअनुसार एकताका लागी दुवै समुहबाट ३÷३ जनाको वार्ता समिति बनाइएको थियो ।
उक्त समितिले सबै विवाद समाधान गरेको र नमिलेका केही विषयहरू अध्यक्ष केसी र श्रेष्ठले मिलाएर एकताको अन्तिम तयारीमा रहेको उनले जानकारी दिए । उनले अब कहिल्यै नफुट्नेगरि एकता हुन लागेको बताए । उनले सबैको सहभागीता र अस्तित्व हुनेगरी एकता गर्न लागिएको बताए ।
एनसीसी विवाद मिलाउन समय दिइने, फेब्रुअरी अन्तिममा १२ औँ महाधिवेशन
संघको अन्तराष्ट्रिय सम्वन्वयन परिषद्मा देखिएको विभाजनपछि केही केही देशमा एनसीसी (राष्ट्रिय समन्वय परिषद्) हरू पनि विभाजित बनेका छन् । दुई वटा एनसीसी रहेका देशमा एकता प्रक्रियाका लागी समय दिईने दिइने सापकोटाले बताए । उनले संघमा सदस्यता लिनको लागी पनि समय थप गरिने जानकारी दिए ।
उनले फुटेका तथा हालको विभाजनमा रहको सदस्यहरूलाई संघको एमआईएस प्रणालीमा जोडिन आग्रह समेत गरे । उनले विधानअनुसार सदस्यता लिएका र पञ्जीकृत सदस्यलाई महाधिवेशनमा सहभागी गराइने र कसैलाई अन्याय नहुने दाबी गरे ।
उनले फेब्रुअरी अन्तिममा १२ औँ अन्तर्राष्ट्रिय महाधिवेशन तथा निर्वाचन सम्पन्न गर्ने लक्ष्य राखेको जानकारी दिए। उनका अनुसार स्टेयरिङ कमिटीले नै निर्वाचन सञ्चालन गर्नेछ । १२औँ महाधिवेशनले एनआरएनएको साख पुनः स्थापित गर्ने उनको दाबी छ ।
उनले समग्र गैरआवासीय नेपालीको ईच्छाअनुसार भएका कमीकमजोरीहरूलाई सुधार्दै अब एनआरएनए एकतावद्ध भएको दाबी गरे ।
न्युज एजेन्सी नेपाल
प्रतिक्रिया दिनुहोस्