एनआरएनएलाई राजनीतिक दल नबन्न मन्त्री खरेलको आग्रह

काठमाडौँ। अन्तरिम सरकारका सञ्चार तथा सूचना प्रविधिमन्त्री जगदीश खरेलले गैरआवासीय नेपाली संघ (एनआरएनए)लाई राजनीतिक दल नबन्न आग्रह गरेका छन् । आइतवार आयोजित एनआरएनएको एकता घोषणा कार्यक्रममा उनले संस्थाका नेताहरु राजनीतिक दलमा आवद्ध हुँदा एनआरएनाको गरिमा खस्किँदै गएको उल्लेख गरेका हुन् ।

उनले भने, “नेपालमा गैरआवासीय नेपाली संघ भन्ने बित्तिकै ओज, गरिमा, विश्वास र सम्मान कायम थियो। तर पछिल्ला वर्षमा धेरै नेता राजनीतिक दलसँग आबद्ध भएपछि संस्थाको गरिमा घट्यो। अब ठूलो अवसर आएको छ, पार्टीको एनआरएन नबनाइ संस्थालाई समग्र गैरआवासीय नेपाली र राष्ट्रको हितमा राख्नुपर्छ।”

खरेलले सरकार गैरआवासीय नेपालीका लागि मतदानको सुविधा र गैरआवासीय नेपाली नागरिकताको कार्यान्वयनमा देखिएका समस्यामा गम्भीर रहेको पनि बताए ।