काठमाडाैँ । सञ्चार तथा सूचना प्रविधिमन्त्री जगदीश खरेलले चलचित्र विकास बोर्डको अध्यक्ष योग्यताक्रमका आधारमा खुला प्रतिष्पर्धाबाट ल्याउने व्यवस्था गर्न प्रस्ताव गरेका छन् ।
विधायन व्यवस्थापन समितिको बिहीवारको बैठकमा भएको चलचित्रसम्बन्धि विधेयकको दफाबार छलफलका क्रममा उनले यस्तो प्रस्ताव गरेका हुन्।
उनले बोर्डलाई स्वायत्त नै बनाउनुपर्ने र बोर्डमा आउने अध्यक्ष खुला प्रतिष्पर्धाबाटै ल्याउने व्यवस्था गर्नुपर्नेमा जोड दिए । मन्त्री र प्रधानमन्त्रीका खल्तीका मान्छे भर्ती गर्ने गरिएकोले देश बिग्रिएको उनको भनाइ छ । उनले हाल खुला नियुक्त हुने पदमा पनि कागजात मिलाएर नामको मात्रै खुला प्रतिष्पर्धा हुने गरेको बताए ।
उनले नियुक्तिको लागि करोडौँको डिल गर्ने अवस्थाको अन्त्य गर्नेगरी कानूनी प्रवन्ध गरिनुपर्नेमा जोड दिए ।उनले अध्यक्ष खुला प्रतिष्पर्धामार्फत मेरिटवेशमा ल्याएपछि बोर्डका सदस्यहरु भने समानुपातिक रुपमा मनोनित गर्न सकिने बताए ।
उनले बोर्डको अध्यक्षलाई चार वर्ष पूर्णरुपमा काम गर्न पाउनेगरी कानून बनाउनुपर्ने बताए । सरकार परिवर्तनपिच्छे नै अध्यक्ष परिवर्तन गर्न लाग्दा अपेक्षित काम गर्न नसक्ने उनको भनाइ छ । काम नगरेको खण्डमा भने हटाउन मिल्ने पनि बनाउनुपर्ने उनले बताए ।
छलफलमा सहभागी सांसदहरूले बोर्डलाई स्वायक्त बनाउनुपर्ने, सात वटै प्रदेशमा यसको कार्यक्षेत्र विस्तार गर्नुपर्ने, बोर्डको अध्यक्ष र सदस्यहरु नियुक्त गर्दा समानुपातिक ढंगले गर्नुपर्ने बताएका थिए । सांसदहरूले बोर्डका सदस्यहरूलाई सरकारले हटाउन नपाउने व्यवस्था गर्नुपर्नेमा पनि जोड दिएका थिए । समिति सभापति तुलसाकुमारी दाहालले अर्को बैठकमा विधेयकमा फेरि छलफल हुने जानकारी दिइन् ।
प्रतिक्रिया दिनुहोस्