काठमाडाैँ । धादिङको बेनिघाट रोराङ गाउँपालिका ५ भैसीगौडा स्थित पृथ्वी लोकमार्गमा गएको बस दुर्घटनामा हालसम्म १९ जनाको मृत्यु भएको छ भने २५ जना घाइते उपचाररत छन्।
पोखराबाट काठमाडौँ तर्फ आउँदै गरेको ग २ ख १४२१ नम्बरको यात्रुबाहक बस अनियन्त्रित भई सडकबाट करिब २०० मिटर तल त्रिशुली नदिको किनारमा खसेको थियो।
दुर्घटना घटेको जानकारी पाएलगत्तै जिल्ला प्रहरी कार्यालय धादिङ, इलाका प्रहरी कार्यालय गजुरी, बेनिघाट लगायतका प्रहरी इकाईहरु, नेपाली सेनाको भैरव गण गजुरी, सशस्त्र प्रहरी बलको बिपत व्यवस्थापन तालिम शिक्षालय कुरिनटारका गोताखोर सहितको उद्दार टोली र स्थानिय जनताको सहकार्यमा उद्धारकार्य सुरु गरिएको थियो।
उद्धारपछि घाइतेहरू मलेखु स्थित राजमार्ग सामुदायिक अस्पताल, शिक्षण अस्पताल मलेखु, जिल्ला अस्पताल धादिङवेशी लगायतमा पठाइए। गम्भीर घाइतेहरू थप उपचारका लागि राष्ट्रिय ट्रमा सेन्टर, नेशनल मेडिकल कलेज कलंकी र त्रिवि शिक्षण अस्पताल महाराजगञ्ज काठमाडौँ लगिएका छन्।
बसमा चालकसहित ४४ जना सवार थिए, जसमा २९ पुरुष र १५ महिला रहेका थिए। प्रहरीले दिएको विवरण अनुसार ट्रमा सेन्टरमा १४ जना, नेसनल मेडिकल कलेज कलंकीमा १० जना र त्रिवि शिक्षण अस्पतालमा १ जना गरी २५ जना घाइते उपचाररत छन्।
प्रतिक्रिया दिनुहोस्