काठमाडाैँ । जिल्ला प्रशासन कार्यालय काठमाडौँले आगामी माघ १८ गते पर्ने फागू पूर्णिमा (होली) पर्वलाई लक्षित गरी सर्वसाधारणलाई शान्तिपूर्ण, मर्यादित र सुरक्षित तरिकाले होली पर्व मनाउन आग्रह गरेको छ।
प्रशासनले जारी गरेको सूचनामा विगतका वर्षहरूसँग तुलना गर्दा अहिले अनावश्यक भव्य कार्यक्रम, खर्चिला झलझली कार्यक्रम, मादक पदार्थको सेवन र सार्वजनिक अशान्ति बढेको पाइएको उल्लेख गरिएको छ।
यसैक्रममा सामाजिक व्यवहार (सुधार) ऐन तथा नियमावली, २०३३ अनुसार धार्मिक, सामाजिक तथा साँस्कृतिक पर्वहरूको मनाउने विषयलाई व्यवस्थित गर्न आदेश दिइएको छ।
सार्वजनिक स्थानमा झैझगडा, जबर्जस्ती रंग छर्किनु, अत्यधिक भागदौड गर्नु, मादक पदार्थको सेवन गरी पारिवारिक वा सामाजिक शान्ति भंग गर्नु, कसैको इच्छा विपरीत रंग वा पानी हान्नु आदि अमर्यादित कार्य नगर्न सूचनामा उल्लेख गरिएकाे छ ।
त्यस्तै आउँदो प्रतिनिधि सभा सदस्य निर्वाचन २०८२ को दृष्टिलगत्तै निर्वाचन आचारसंहिता पालन गर्नुपर्नेमा जोड दिइएको छ। यसअनुसार होली पर्वमा उम्मेदवार वा दलका चिन्ह/तस्विर अङ्कित भेष्ट, टि-सर्ट, कमिज, गम्छा, ज्याकेट, मास्क, झोला आदिको प्रयोग पूर्णरूपमा प्रतिबन्ध गरिएको छ।
प्रशासनले परिवारजन र साथीभाइसँगै घरभित्र वा निजी कम्पाउण्डमा पर्व मनाउन बाधा नपर्ने तर खुला सडक वा सार्वजनिक स्थानमा भिड जम्मा गर्ने, मेला महोत्सव गर्ने, मञ्चमा सांगीतिक कार्यक्रम गर्ने, मादक पदार्थको वितरण/सेवन गर्ने तथा निर्वाचन आचारसंहिता विपरीत गतिविधि नगर्न अनुराेध गरिएकाे छ ।
सहायक प्रमुख जिल्ला अधिकारी मुक्तिराम रिजालले सबै नागरिकलाई आफ्नो अधिकारको उपयोग गर्दा अरूको अधिकार हनन् नहुने गरी मर्यादित, अनुशासित र व्यवस्थित ढंगले होली पर्व मनाउन आग्रह गरेका छन्।
प्रतिक्रिया दिनुहोस्