काठमाडौँ । निर्वाचन आयोगले आगामी फागुन २१ गते हुने प्रतिनिधि सभा निर्वाचनका लागि मतदान केन्द्रहरूलाई महिला, ज्येष्ठ नागरिक तथा अपाङ्गता मैत्री बनाइएको जनाएको छ ।
आयोगका अनुसार अशक्त, ज्येष्ठ नागरिक, अपाङ्गता भएका व्यक्ति, गर्भवती, सुत्केरी तथा यौनिक अल्पसङ्ख्यक मतदाताले सहज रूपमा मतदान गर्न सक्ने गरी आवश्यक व्यवस्थापन गरिएको छ ।
न्युज एजेन्सी नेपालसँगको संक्षिप्त कुराकानीमा आयुक्त डा. जानकीकुमारी तुलाधरले मतदानबाट कुनै पनि मतदाता वञ्चित नहोस् भन्ने उद्देश्यका साथ केन्द्रदेखि जिल्लासम्म अनुगमन अधिकृत खटाइएको जानकारी दिइन् । उनका अनुसार सूक्ष्म अनुगमनको समेत व्यवस्था गरिएको छ ।
उनले कुनै पनि मतदान केन्द्रमा सबै मतदाताको सहज पहुँच सुनिश्चित गर्ने विषयमा आयोग दृढ रहेको उल्लेख गर्दै सोहीअनुसार मतदान स्थलको व्यवस्थापन गरिएको बताइन् । ज्येष्ठ नागरिक, अपाङ्गता भएका व्यक्ति, गर्भवती, सुत्केरी तथा यौनिक अल्पसङ्ख्यक मतदाताले लामो लाइनमा बस्न नपर्ने व्यवस्था मिलाइएको र उनीहरूलाई प्राथमिकताका आधारमा तत्काल मतदान गर्न दिइने स्पष्ट पारिन्।
आयुक्त तुलाधरले आम मतदातालाई सहज ढंगले मतदान गर्न पाउने वातावरण निर्माण गर्न आयोगले कुनै कसुर बाँकी नराख्ने प्रतिबद्धता व्यक्त गरिन्।
प्रतिक्रिया दिनुहोस्