काठमाडाैँ । निर्वाचनको मौन अवधि सुरु भएसँगै धनुषामा रहेका नेपाल–भारत सीमा नाकाहरू सिल गरिएको छ। प्रतिनिधि सभा निर्वाचनलाई लक्षित गर्दै सुरक्षा सतर्कता बढाइएको जिल्ला प्रहरी कार्यालय धनुषाले जनाएको छ।
प्रहरी नायव उपरीक्षक गणेशबहादुर बमका अनुसार निर्वाचनमा अवाञ्छित गतिविधि हुन नदिन सुरक्षा योजनाअनुसार जटहीलगायत जिल्लाका भारतीय सीमा नाका गत राति १२ बजेदेखि बन्द गरिएको हो। उक्त नाका फागुन २१ गते मतदान कार्य सम्पन्न भएपछि मात्र पुनः सञ्चालनमा ल्याइनेछ।
उनले सीमा क्षेत्रबाट हुन सक्ने सुरक्षा चुनौतीलाई ध्यानमा राखेर सवारीसाधन तथा पैदल आवतजावतमा पूर्ण रोक लगाइएको जानकारी दिए । “१८ गते राति १२ बजेदेखि २१ गते रातिसम्म जिल्लाका भारतीय सीमासँग जोडिएका सबै नाका सिल गरिएको छ। नाकाहरूमा कडाइका साथ चेकजाँच भइरहेको छ। कुनै पनि सवारीसाधन र व्यक्तिलाई आवतजावत गर्न दिइएको छैन,” उनले भने ।
प्रहरीका अनुसार निर्वाचनलाई सुरक्षित र शान्तिपूर्ण रूपमा सम्पन्न गर्न एकीकृत सुरक्षा योजना तर्जुमा गरी कार्यान्वयनमा ल्याइएको छ। सोही योजनाअनुसार नेपाल प्रहरी, सशस्त्र प्रहरी बल, नेपाली सेना र राष्ट्रिय अनुसन्धान विभागका सुरक्षाकर्मीहरू परिचालन भइसकेका छन्।
नेपाल–भारत सीमा क्षेत्रमा दुवै देशका सुरक्षा अधिकारीहरूबिच भएको समन्वय बैठकपछि निर्वाचन केन्द्रित सुरक्षा रणनीति तय गरिएको र त्यसैअनुसार सीमा नाका बन्द गरिएको जनाइएको छ।
प्रतिक्रिया दिनुहोस्