काठमाडौँ । निर्वाचन आयोगले प्रतिनिधि सभा सदस्य निर्वाचन २०८२ का लागि आवश्यक सम्पूर्ण तयारी पूरा भएको जनाएको छ। आयोगका प्रवक्ता नारायणप्रसाद भट्टराईका अनुसार केन्द्रीय तहमा गर्नुपर्ने सबै व्यवस्थापन कार्य सम्पन्न भइसकेका छन्।
आयोगको टोली माघ २ गतेदेखि नै सबै निर्वाचन क्षेत्रमा खटिएर मुख्य निर्वाचन अधिकृत तथा निर्वाचन अधिकृतको कार्यालय स्थापना गरिसकेको छ। पछिल्लो विवरणअनुसार आयोगका कर्मचारी तथा सुरक्षाकर्मी देशभरका २३ हजार १ सय १२ वटै मतदान केन्द्रमा पुगिसकेका छन्। मतदान अधिकृतहरूले केन्द्रमा सूचना टाँस गर्ने, प्रशासनिक व्यवस्थापन मिलाउनेलगायतका आवश्यक तयारी गरिरहेका छन्।
स्थानीय तहमा राजनीतिक दल र उम्मेदवारहरूसँग सर्वदलीय बैठक गरी मतदान प्रक्रियाबारे साझा समझदारी बनाउने काम पनि भइरहेको आयोगले जनाएको छ। मतदान केन्द्रमा बुथ निर्माण कार्य भोलिसम्म सम्पन्न हुने र त्यसपछि तोकिएकै समयमा बिहान ७ बजेदेखि बेलुकी ५ बजेसम्म मतदान सञ्चालन हुने प्रवक्ता भट्टराईले जानकारी दिए।
मतदानका क्रममा जिल्ला, निर्वाचन क्षेत्र वा मतदान केन्द्र तहमा देखिन सक्ने सम्भावित समस्यालाई तत्काल सम्बोधन गर्न आयोगले आवश्यक सहजीकरण गरिरहेको उनको भनाइ छ। सम्पूर्ण जनशक्ति, सामग्री र कार्यविभाजन मिलिसकेकोले निर्वाचन शान्तिपूर्ण रूपमा सम्पन्न हुनेमा आयोग विश्वस्त रहेको जनाएको छ।
प्रतिक्रिया दिनुहोस्