काठमाडाैँ । निर्वाचन आयोगकी आयुक्त डा. जानकीकुमारी तुलाधरले फागुन २१ गते हुने प्रतिनिधि सभा सदस्य निर्वाचनमा आम मतदातालाई आफ्नो मताधिकार प्रयोग गर्न आग्रह गरेकी छन् ।
न्युज एजेन्सी नेपालसँगको कुराकानीमा डा. तुलाधरले सबै मतदातालाई समयमै आफ्ना मतदान केन्द्रमा पुगेर अमूल्य मताधिकारको प्रयोग गर्न अनुरोध गरिन् । उनले असल प्रतिनिधि चयनका लागि मतदान अनिवार्य रहेको उल्लेख गर्दै निर्वाचनलाई स्वतन्त्र, स्वच्छ, निष्पक्ष, भयरहित, विश्वासिलो र मितव्ययी बनाउन सबै पक्षको दायित्व हुने बताइन् ।
डा. तुलाधरले नागरिकसँगै राजनीतिक दल, सुरक्षा निकाय, कर्मचारी र अन्य सरोकारवालालाई समेत निर्वाचनमा सहयोग गर्न आग्रह गरिन् । उनले भनिन्, “फागुन २१ गते समयमा आफ्ना मतदान केन्द्रमा गएर मताधिकार प्रयोग गर्नुहोस्। एउटा भोट अमूल्य हुन्छ र यसले असल व्यक्तिको चयनमा मद्दत गर्छ। निर्वाचन सफल बनाउन सबैले आफ्नो योगदान दिनु अत्यावश्यक छ।”
निर्वाचन आयोगका अनुसार, फागुन २१ गते हुने निर्वाचनको सम्पूर्ण तयारी अन्तिम चरणमा पुगेको छ।
प्रतिक्रिया दिनुहोस्