काठमाडाैँ। फ्लोरिकल्चर एसाेसिएसन नेपाल (फ्यान) को आयोजनामा ‘२७ औँ फ्लोरा एक्स्पो २०८२’ काे तयारी पूरा भएको छ। भाेलिदेखि ८ गतेसम्म काठमाडौँको भृकुटीमण्डपमा सञ्चालन हुनेछ ।
‘स्वच्छ वातावरण, रोजगारी तथा आर्थिक समृद्धिको लागि पुष्प व्यवसाय’ भन्ने मूल नाराका साथ आयोजना हुने यस एक्स्पोमा ६५ व्यावसायिक स्टल, ११ अफिसियल स्टल, २ प्रतिस्पर्धात्मक स्टल र २ फुड स्टल गरी जम्मा ८३ स्टल रहेकाे आयोजकले जनाएका छन्। मेलामा मौसमी फूल, आलंकारिक बोटबिरुवा, कट फ्लावर, सुनाखरी, कृषि औजार, मलखाद र आधुनिक पुष्प खेती प्रविधिका सामग्री प्रदर्शन तथा बिक्रीका लागि राखिएका छन् ।
फ्यानका वरिष्ठ उपाध्यक्ष तथा मेला संयोजक रामबहादुर तामाङका अनुसार मेलाको मुख्य आकर्षण विभिन्न विधामा पुष्प व्यवसायीबिच प्रतियोगिता हुनेछ र उत्कृष्टलाई पुरस्कृत गरिनेछ। साथै, बोटबिरुवामा लाग्ने रोग तथा कीराहरूको निदानका लागि विशेषज्ञसहितको ‘प्लान्ट क्लिनिक’ सञ्चालन गरिनेछ। सामाजिक उत्तरदायित्व अन्तर्गत चैत ६ गते रक्तदान कार्यक्रम पनि आयोजना हुने तामाङले जानकारी दिए।
फ्यानका अनुसार हाल ५२ जिल्लामा फैलिएको पुष्प व्यवसायमा ८ अर्ब ८३ करोडभन्दा बढी लगानी भएको छ र ५३ हजारभन्दा बढीले प्रत्यक्ष तथा अप्रत्यक्ष रोजगारी पाएका छन्। यद्यपि, कमजोर आर्थिक अवस्था र नीतिगत चुनौतीका कारण आ.व. २०८१/८२ मा पुष्प व्यवसायको वार्षिक कारोबार ३ अर्ब ३७ करोडमा सीमित हुने अनुमान छ। अघिल्लो वर्ष यो रकम ३ अर्ब ६८ करोड थियो।
समग्र कारोबार घटे पनि विदेशी फूलको आयात ५४.२७ प्रतिशतले घटेर १२ करोड ७० लाख रुपैयाँमा झरेको छ भने निर्यात १०९.१६ प्रतिशतले वृद्धि भई २ करोड १३ लाख रुपैयाँ पुगेको छ। आयोजकले मेलामा करिब ६० हजार दर्शकको उपस्थिति र १ करोड २० लाख रुपैयाँभन्दा बढीको व्यावसायिक कारोबार हुने अपेक्षा व्यक्त गरेका छन्।
प्रतिक्रिया दिनुहोस्