काठमाडौँ । कृषि तथा पशुपन्छी विकास तथा वन तथा वातावरण मन्त्री गिता चौधरीले अव्यवस्थित बन्दै गएको कालीमाटी फलफूल तथा तरकारी बजारको स्थलगत निरीक्षण गरेकी छिन् ।
बजार व्यवस्थापनमा कमजोरीबारे गुनासो आएपछि उनले बिहीबार (चैत्र २६ गते) बिहानै बजार पुगेर अनुगमन गरेकी हुन् । बजार अनुगमनका क्रममा इजाजतपत्र लिएका व्यवसायीको नाममा अन्य व्यक्तिले भाडामा लिएर पसल सञ्चालन गरेको पाइएको छ ।
साथै, विषादी परीक्षण नभई तरकारी उपभोक्तासम्म पुग्ने गरेको, बिलविजकमा अनियमितता, इजाजतपत्र नवीकरण नगरेका पसल सञ्चालनमा रहेको जस्ता समस्या भेटिएका छन् ।
मन्त्री चौधरीले कालीमाटी बजारअन्तर्गत थोक बजारका ६१०, ६४५, ६९३, ७०१, ७०४, ७११, ७१८ नम्बर लगायतका पसलहरूमा निरीक्षण गर्दा इजाजत लिएका व्यवसायी स्वयम् उपस्थित नभएको पाइएको छ । कतिपय स्थानमा एकै दर्तामा दुईदेखि तीन जनाले व्यवसाय सञ्चालन गरेको समेत भेटिएको छ ।
त्यस्तै, माछा पसलहरूमा पनि उस्तै प्रवृत्ति देखिएको छ । मन्त्री चौधरीले २४, १३ ‘ख’, ११ ‘क’, १०, ११, १० ‘ख’ नम्बरका माछा पसलहरूको निरीक्षण गरिन् । निरीक्षणका क्रममा चार जना व्यापारीले आपूर्तिकर्ताबाट ल्याइएको माछा सोही बजारमा थोक रूपमा बिक्री गर्ने क्रममा बिलविजकमा अनियमितता प्रयोग गरेको पाइएको छ ।
मन्त्री चौधरीले बजार व्यवस्थापनमा देखिएका अनियमितता तुरुन्त सुधार गर्न सम्बन्धित निकायलाई निर्देशन दिएकी हुन् । साथै, उपभोक्ताको स्वास्थ्य र अधिकारमा असर पर्ने गतिविधि कडाइका साथ नियन्त्रण गरिने चेतावनीसमेत दिएकी छिन् ।
प्रतिक्रिया दिनुहोस्