विभिन्न स्थानमा नेपाल टेलिकमकाे सेवा अवरुद्ध

काठमाडाैँ । विहीबारबाट निरन्तरको हावाहुरी सहितको वर्षा र देशका विभिन्न स्थानमा गएको बाढी पहिरोका कारण नेपाल टेलिकमकाे कतिपय स्थानका सेवा अवरुद्ध भएकाे छ ।

भारी वर्षा र पहिरोको कारणले यात्रामा भएको कठिनाई, अप्टिकल फाइबरमा भएको क्षति, विद्युत आपूर्तिमा भएको अवरोध तथा हिमपात, वर्षात् र वादलका कारण सोलार साइटको न्यून प्रभावकारिताका कारण समेत कम्पनीले उपलब्ध गराइरहेको सेवा निरन्तरतामा कठिनाई भएकाे जनाइएकाे छ।

कम्पनीका अनुसार प्राविधिक रुपमा सिस्टमबाट गर्न सकिने मर्मत सम्भारका कार्य तथा सम्भव भएका स्थानमा सेवाको मर्मतकार्य निरन्तर भइरहेको छ। मौसममा हुने सुधार क्रमसँगै सम्बन्धित कार्यस्थलमा खटिने गरी प्राविधिकहरु तयारी अवस्थामा रहेको जनाइएकाे छ ।