काठमाडौँ । ई-सेवा लिमिटेडको प्रमुख कार्यकारी अधिकृत (सिइओे) मा निरज शर्मा नियुक्त भएका छन् ।
इसेवा सञ्चालक समितिको भदौ ३० गते बसेको बैठकले आजदेखि लागू हुने गरी शर्मालाई चार वर्षका लागि सिइओ नियुक्त गरेको हो ।
बैंकिङ तथा वित्तीय क्षेत्रमा २५ वर्षभन्दा बढीको नेतृत्वदायी अनुभव भएका शर्मा ट्रान्जेक्सन बैंकिङ, कार्ड प्रणाली, डिजिटल रूपान्तरण तथा रिटेल बैंकिङका क्षेत्रमा अनुभवी छन्। डिजिटल नवप्रवर्तन, रणनीतिक वृद्धि, ग्राहककेन्द्रित सेवा विकास, टोली नेतृत्व तथा संस्थागत रूपान्तरणमा समेत उनको अनुभव रहेको इसेवाले जनाएको छ । शर्माले आजदेखि जिम्मेवारी सम्हालेका छन् ।
बैंकिङ तथा डिजिटल वित्तीय सेवाको क्षेत्रमा लामो अनुभव भएका शर्माको नेतृत्वले ई-सेवाको आगामी रणनीतिक प्राथमिकतालाई अघि बढाउन सहयोग पुग्ने अपेक्षा कम्पनीले गरेको छ ।
बदलिँदो ग्राहक आवश्यकता र डिजिटल वित्तीय सेवाको विस्तारसँगै कम्पनीको सेवा तथा पहुँचलाई थप सुदृढ बनाउन उनको नेतृत्व महत्वपूर्ण हुने इसेवा सञ्चालक समितिले जनाएको छ । ई-सेवाका निवर्तमान प्रमुख कार्यकारी अधिकृत जगदीश खड्काको चार वर्षे कार्यकाल पूरा गरेपछि शर्मा नयाँ सिइओ नियुक्त भएका हुन् ।
प्रतिक्रिया दिनुहोस्