काठमाडौँ । उद्योग, वाणिज्य तथा आपूर्तिमन्त्री दामोदर भण्डारीले नेपालमा जलविद्युतको अपार सम्भावना रहेको बताएका छन् ।
शुक्रवार काठमाडौँको भृकुटीमण्डपमा नेपाल पावर, लाइट एण्ड इलेक्ट्रिक, नेपाल कन्जुमर इलेक्ट्रोनिक्स एण्ड होम अप्लायन्सेस अन्तर्राष्ट्रिय प्रदर्शनीको उद्घाटन गर्दै मन्त्री भण्डारीले नेपालमा विद्युत उत्पादन बढ्दै गएको र यसको खपत तथा बजार दुवै सुनिश्चित हुँदै गएको उल्लेख गरे ।
उनका अनुसार नेपालले छिमेकी मुलुकमा विद्युत निर्यात गर्न सक्ने सम्भावना बन्दै गएको छ भने भित्रै विद्युतीय सामग्रीको प्रयोग पनि तीव्र गतिमा बढिरहेको छ । उनले स्वदेशी उत्पादनलाई गुणस्तरीय बनाएर बजारमा प्रतिष्पर्धा गर्नुपर्ने आवश्यकता औँल्याउँदै नेपाल यसका लागि तयार रहेको बताए ।
मन्त्री भण्डारीले निजी क्षेत्रको पहललाई सरकारले विभिन्न नीतिगत सहुलियत र लगानी सहजीकरणमार्फत सहयोग गरिरहेको जानकारी दिए । उनले भने, “नेपालमा जलविद्युतको अपार सम्भावना छ, उत्पादन भइरहेको छ र यसको खपत सुनिश्चित छ । यसले भविष्यमा अझ ठूलो सम्भावना बोकेको छ ।”
उनले विदेशी कम्पनीहरुलाई पनि नेपालमा विद्युत तथा विद्युतीय सामग्रीमा लगानी गर्न आमन्त्रण गर्दै प्रदर्शनीमा सहभागिता जनाएका सबैलाई स्वागत गरे । शुक्रवारबाट सुरू भएको उक्त प्रदर्शनी आइतवारसम्म सञ्चालन हुने आयोजकले जनाएको छ ।
प्रतिक्रिया दिनुहोस्