स्याङ्जा । स्याङ्जाको गल्याङ नगरपालिका वडा नम्बर १ राम्दीस्थित सिद्धार्थ राजमार्गमा प्रहरीले दुई जनालाई नियन्त्रित लागू औषधसहित नियन्त्रणमा लिएको छ।
आज दिउँसो करिब २ः१० बजे वडा प्रहरी कार्यालय वालिङ र अस्थायी प्रहरी चौकी राम्दीबाट खटिएको प्रहरी टोलीले नियमित सवारी चेकजाँचको क्रममा बुटवलबाट पोखरातर्फ जाँदै गरेको लु. १ ख. ८४५२ नम्बरको यात्रुवाहक बसमा चढेका दुई जनाको साथबाट लागू औषध बरामद गरेको जिल्ला प्रहरी कार्यालय स्याङ्जाले जनाएको छ।
पक्राउ पर्नेमा कास्की, पोखरा महानगरपालिका वडा नम्बर ३२ लेखनाथ बस्ने २४ वर्षीय अजय परियार र ३० वर्षीय अमृत थापा रहेका छन्। उनीहरूको साथबाट डाईजेपाम ३४ एम्पुल, नुफिन ३४ एम्पुल र फेनेरागन ३४ एम्पुलसहित जम्मा १०२ एम्पुल लागू औषध बरामद गरिएको प्रहरीले जनाएको छ।
पक्राउ परेका दुवै जनालाई आवश्यक अनुसन्धान अघि बढाइएको जिल्ला प्रहरी कार्यालय स्याङ्जाले जनाएको छ।
प्रतिक्रिया दिनुहोस्