काठमाडौँ । काठमाडौँ महानगर प्रहरी बलले आगामी भदौ १४ गते आफ्नो ३३ औँ वार्षिकोत्सव विशेष कार्यक्रम गरी मनाउने भएको छ।
राष्ट्रिय सभा गृहमा आयोजना हुने कार्यक्रममा काठमाडौँ महानगरका प्रमुख, उपप्रमुख र प्रमुख प्रशासकीय अधिकृतलगायतको उपस्थित रहनेछ।
महानगर प्रहरी बलका प्रमुख राजुनाथ पाण्डेका अनुसार वार्षिकोत्सवलाई अवसर बनाएर भदौ ११ गते स्वयम्भू परिसरमा विशेष सरसफाइ, भदौ १२ गते नयाँ वानेश्वरदेखि पुरानो वानेश्वरसम्म सरसफाइ र भदौ १३ गते बिहान बालाजु पार्कमा वृक्षारोपण कार्यक्रम सम्पन्न गरिनेछ ।
त्यसैगरी, वार्षिकोत्सवकै अवसरमा आ.व. ०८१/०८२ मा उत्कृष्ट कार्य सम्पादन गर्ने प्रहरीहरूलाई महानगर प्रहरी गौरव पुरस्कार,उत्कृष्ट महानगर प्रहरी पुरस्कार,महानगर प्रहरी पुरस्कार,तथा ग्रेड वृद्धिसहितका सम्मान प्रदान गरिने पाण्डेले बताए। उनका अनुसार यस्ता पुरस्कारहरूले प्रहरीहरूको हौसला अभिवृद्धि गर्ने विश्वास लिइएको छ।
काठमाडौँ महानगर प्रहरी बलको इतिहास हेर्दा, महानगरपालिका घोषणा हुनु अघि नै २०५० साल भदौ १४ गते यसलाई नगर प्रहरी सेवाूका रूपमा स्थापना गरिएको थियो।
प्रतिक्रिया दिनुहोस्