काठमाडाैँ । दार्चुला पावर लिमिटेडको वार्षिक साधारणसभा शुक्रबार रूपमा सम्पन्न भएको छ। सभाले आर्थिक वर्ष २०८१/८२ का सबै साधारण तथा विशेष प्रस्तावहरू वित्तीय विवरण पारित गर्नेदेखि प्रारम्भिक सार्वजनिक निष्काशन (आईपिओ) जारी गर्ने निर्णयसम्म सर्वसम्मतिले अनुमोदन गरेको कम्पनीले जनाएको छ।
अपि पावर कम्पनी लिमिटेडको सहायक कम्पनी रहेको दार्चुला पावर लिमिटेडले दार्चुला जिल्लामा २८.३०४ मेगावाट क्षमताको मध्य चमेलिया जलविद्युत आयोजना निर्माण गरिरहेको छ। करिब ५६६ करोड रुपैयाँ लागत अनुमान गरिएको आयोजना तीव्र गतिमा अघि बढिरहेको कम्पनीको भनाइ छ।
साधारणसभामा सञ्चालक समितिका अध्यक्षले प्रस्तुत गरेको आर्थिक वर्ष २०८१/८२ को वार्षिक प्रतिवेदन विस्तृत छलफलपछि सर्वसम्मतिले पारित गरिएको छ। प्रतिवेदनमा आयोजनाको भौतिक प्रगति, आर्थिक व्यवस्थापन, सञ्चालनसम्बन्धी चुनौती र आगामी वर्षका रणनीतिक लक्ष्यहरू समेटिएका थिए।
त्यस्तै, वासलात, नाफा–नोक्सान, नगद प्रवाह विवरणलगायत सबै वित्तीय विवरणहरू पनि सभाले स्वीकृत गरेको छ। कम्पनीले वित्तीय शिस्त, लागत नियंत्रण तथा आयोजना–केन्द्रित खर्च व्यवस्थापनमा देखाएको पारदर्शिता सभामा प्रशंसनीय रहेको बताइएको छ।
कम्पनी ऐन २०६३ को दफा १११ बमोजिम आर्थिक वर्ष २०८२/८३ का लागि नयाँ लेखापरीक्षक नियुक्त गर्ने प्रस्ताव समेत सभाले अनुमोदन गरेको छ।
साथै, दार्चुला पावर लिमिटेडका साधारण सेयरहरूको प्रारम्भिक सार्वजनिक निष्काशन (आईपिओ) जारी गर्ने प्रस्ताव पनि सभाले पारित गरेको छ। यसका लागि कम्पनीले मुक्तिनाथ क्यापिटल लिमिटेडसँग सम्झौता गरी निष्काशन प्रक्रिया अघि बढाइसकेको प्रबन्ध निर्देशक शास्वत चालिसेले सभालाई जानकारी दिएका छन्।
आईपिओ अघि कम्पनीको अधिकृत पूँजी तथा जारी पूँजी वृद्धि गर्ने र त्यसअनुसार प्रबन्धपत्र तथा नियमावलीमा आवश्यक संशोधन गर्ने प्रस्तावहरू समेत सभाले अनुमोदन गरेको छ।
सभामा बोल्दै कम्पनीका सञ्चालक सञ्जीव न्यौपानेले मध्य चमेलिया जलविद्युत आयोजनाले हासिल गरेको प्रगतिप्रति खुशी व्यक्त गर्दै कम्पनीको रणनीति, व्यवस्थापन क्षमता र कार्यसम्पादन अत्यन्त प्रभावकारी रहेको बताए।
उनका अनुसार निर्माण गति, ठेक्का व्यवस्थापन, सामग्री आपूर्ति, स्थानीय समन्वय तथा वित्त व्यवस्थापनको संयोजनका कारण कम्पनीले आयोजनालाई तोकिएको समयभन्दा अगावै सम्पन्न गर्ने लक्ष्यबारे सेयरधनीहरूलाई विश्वस्त तुल्याएको छ।
प्रतिक्रिया दिनुहोस्