काठमाडौँ । नेपाल उद्योग वाणिज्य महासंघको खेलकुद तथा मनोरञ्जन फोरमको संयोजनमा महासंघ र राष्ट्रिय कलाकारबिच मैत्रीपूर्ण फुटसल प्रतियोगिता सम्पन्न भएको छ।
बालुवाटारस्थित ढुकु फुटसल मैदानमा आयोजना गरिएको खेलमा महासंघको टोलीले कलाकार टोलीलाई ७–४ गोल अन्तरले हराएको थियो।
खेलको उद्घाटन महासंघका अध्यक्ष चन्द्र प्रसाद ढकालले रिबन काटेर गरेका थिए । उद्घाटनको क्रममा महासंघ कार्यसमिति पदाधिकारी र कलाकारबिच १० मिनेटको मैत्रीपूर्ण खेल पनि आयोजना गरिएको थियो, जसको स्कोर ०–० रह्यो।
खेलको पहिलो सत्रमा महासंघले कलाकार टोलीमाथि ३–० को अग्रता बनाएको थियो। दोस्रो सत्रमा कलाकार टोलीले ३–३ को बराबरी गर्दै खेललाई रोमाञ्चक बनायो। अन्ततः महासंघको टोलीले थप ४ गोल गर्नुका साथै कलाकार टोलीले १ गोल गरेपछि खेल ७–४ मा सम्पन्न भयो।
खेल उद्घाटन गर्दै अध्यक्ष ढकालले यस प्रतियोगिता केवल प्रतिस्पर्धाका लागि नभई आपसी मित्रता र सहकार्य बढाउने अवसर भएको बताए।
महासंघ टोलीमा अध्यक्ष चन्द्र ढकाल, उपाध्यक्ष हेमराज ढकाल र ज्योत्सना श्रेष्ठ, कोषाध्यक्ष भरतराज आचार्य लगायतको सहभागिता रहेको थियो। कलाकार टोलीमा शिव श्रेष्ठ, धिरेन शाक्य, रबिन्द्र खड्का, मोहन निरौला लगायत सहभागी भएका थिए।
कार्यक्रम संयोजक तथा खेलकुद फोरम अध्यक्ष हरि बहादुर कार्कीले उद्योगी व्यवसायी र कलाकारबीचको मित्रता र सद्भाव थप सुदृढ बनाउने उद्देश्यले प्रतियोगिता आयोजना गरिएको र वरिष्ठ कलाकारको सहभागिताले खेल रोमाञ्चक र सफल भएको बताए।
प्रतिभागी खेलाडीलाई महासंघका अध्यक्ष ढकालले मायाँको चिनो प्रदान गरे ।
प्रतिक्रिया दिनुहोस्